ق ر پرەزيدەنتى قاسىم-جومارت توقايەۆ ماڭعىستاۋ جۇرتشىلىعىمەن كەزدەستى.
كەزدەسۋدە وبلىستا تۇيە جانە اسىل تۇقىمجى جىلقى ءوسىرۋ تۋرالى ءسوز قوزعادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ماڭعىستاۋدىڭ تابيعاتى تۇيە وسىرۋگە وتە قولايلى ەكەنى بەلگىلى. ءقازىر وبلىستا 90 مىڭعا جۋىق تۇيە بار. بۇل دەرەكتى پرەزيدەنت قاسىم-جومارت توقايەۆ ايتتى، دەپ حابارلايدى قازاقپارات.
«تۇيە ونىمدەرىنە بۇكىل ەلىمىزدە سۇرانىس وتە جوعارى. ودان الىناتىن شيكىزاتتى تەرەڭ وڭدەۋ جۇمىسىن قولعا الۋ قاجەت. بۇل ءونىمنىڭ ءتۇرىن كوبەيتەدى ءارى ونىڭ باعاسىنا وڭ ىقپال ەتەدى. ۇكىمەتكە تۇيە شارۋاشىلىعىن قولداۋعا ارنالعان مەملەكەتتىك شارالاردى كۇشەيتۋ ماسەلەسىن پىسىقتاۋدى تاپسىرامىن. بۇل سالاعا سۋبسيديا بەرۋ جولدارىن دا قاراستىرۋ كەرەك»، - دەدى مەملەكەت باسشىسى.
ول حالقىمىز ءۇشىن جىلقىنىڭ ورنى قاشاندا ەرەكشە ەكەنىنە توقتالدى. قازاق اداي جىلقىسىن ماڭعىستاۋدىڭ بىرەگەي بايلىعى دەۋگە بولادى. بۇل ارعىماقتار شولگە ەرەكشە شىدامدى، الىس جولعا ءتوزىمدى ەكەنىن ءبارى بىلەدى.
«ماڭعىستاۋ تۇلپارلارى الىسقا شاباتىن حالىقارالىق مارافون جارىستارىندا ءاردايىم بايگە الىپ ءجۇر.
جاقىندا وتكەن «ۇلى دالا جورىعىندا» وبلىس شاباندوزدارى جەكە-دارا وزىپ كەلدى. قازاق اداي جىلقىسىن الەمگە تانىتا الساق، بۇل ءبىزدىڭ تاعى ءبىر تاماشا برەندىمىزگە اينالادى. سوندىقتان، ۇكىمەتكە ونى عىلىمي تۇردە اسىل تۇقىمدى مال رەتىندە تانۋ جانە كوبەيتۋ ءۇشىن ءتيىستى جۇمىستاردى جەدەل قولعا الۋدى تاپسىرامىن»، - دەدى مەملەكەت باسشىسى.