كەۋدە قۋىسى دەفورماسياسىن ەمدەۋدىڭ ادىس-تاسىلدەرى تۋرالى الماتى قالاسىنىڭ وكق الاڭىندا الماتى قالاسى قوعامدىق دەنساۋلىق ساقتاۋ باسقارماسىنىڭ №1 قالالىق كلينيكالىق اۋرۋحاناسىنىڭ كەۋدە بولىگىنىڭ حيرۋرگياسى ورتالىعىنىڭ مەڭگەرۋشىسى نۇرلان جارىلقاپوۆ ايتتى، - دەپ حابارلايدى almaty-akshamy.kz
«كەۋدە قۋىسىنىڭ دەفورماسياسى ادامداردىڭ 2 %-دە كەزدەسەدى. سۇيەك جانە شەمىرشەك تىندەرىندەگى وزگەرىستەر كەۋدە قۋىسىنىڭ تىرەك فۋنكسياسىن دا، قوزعالعىشتىعىنىڭ قاجەتتى مولشەرىن دە تومەندەتەدى. كەۋدە قۋىسىنىڭ دەفورماسياسى (ءتوس جانە قابىرعالار) تەك كوسمەتيكالىق اقاۋ بولىپ قانا قويمايدى جانە پسيحولوگيالىق پروبلەمالاردى عانا ەمەس، سونىمەن قاتار كەۋدە مۇشەلەرىنىڭ ديسفۋنكسياسىنا اكەلەدى. بۇل پاتولوگيادا تىنىس الۋعا بايلانىستى پروبلەمالار ءجيى تۋىندايدى، قاتتى دەفورماسيا كەزىندە جۇرەك ىعىسۋى، ءارى ونىڭ جۇمىسىن بۇزىلۋى مۇمكىن. سونداي-اق، اۋىر جاعدايداعى كەۋدە دەفورماسياسى ومىرتقا وزەگىنىڭ قيسايۋىنا اكەلەدى. دەفورماسيانىڭ بۇل ءتۇرى تەك ەستەتيكالىق جاعىنان عانا ەمەس، سونىمەن قاتار مەديسينالىق كورسەتكىشتەر بويىنشا دا تۇزەتىلۋى كەرەك»،- دەپ باستادى بايانداماسىن سپيكەر.
ماماننىڭ ايتۋىنشا، كەۋدە قۋىسىنىڭ دەفورماسيالانۋ سەبەبى تۋا بىتكەننەن، سونىمەن بىرگە، جۇرە پايدا بولۋى مۇمكىن. كلينيكالىق تاجىريبەدە كەۋدە قۋىسىنىڭ كوبىنەسە شۇڭعىما ءتارىزدى دەفورماسياسى جانە شوقى ءتارىزدى دەفورماسيا تۇرلەرى كەزدەسەدى.
«كەۋدە قۋىسىنىڭ شۇڭعىما ءتارىزدى دەفورماسياسى ەڭ كوپ تارالعان جانە ول 400 جاڭا تۋعان نارەستەنىڭ ىشىندە بىرەۋىندە كەزدەسەدى. شوقى ءتارىزدى كەۋدە دەفورماسياسى دەفورماسيانىڭ ەكىنشى ءجيى كەزدەسەتىن ءتۇرى، ول شۇڭعىما ءتارىزدى تۇرىنە قاراعاندا قاراعاندا 5 ەسە از كەزدەسەدى. شوقى ءتارىزدى كەۋدە دەفورماسياسى كەزىندە كەۋدە قۋىسىنىڭ الدىڭعى-ارتقى ولشەمى ۇلعايادى جانە ءار ءتۇرلى دەڭگەيگە جانە پوزيسياعا يە بولۋى مۇمكىن جوتا تۇرىندە قالىپتاسادى، سونىمەن قاتار كەۋدە قۋىسىنىڭ بۇيىرلىك ولشەمى تارىلادى»، - دەدى نۇرلان جارىلقاپوۆ.
بۇل دەفورماسيانىڭ دامۋىن تۇسىندىرەتىن بىرنەشە تەوريالار بار. كەيبىر اۆتورلار شۇڭعىما ءتارىزدى دەفورماسيانىڭ دامۋى ءتوس سۇيەكتى ارتقا قاراي يتەرەتىن قابىرعا شەمىرشەگىنىڭ شامادان تىس وسۋىنە بايلانىستى بولۋى مۇمكىن دەپ ەسەپتەيدى. ديافراگماتيكالىق اۋىتقۋلار، راحيت نەمەسە جاتىرىشىلىك قىسىمنىڭ جوعارىلاۋى دا ءتوس سۇيەگىنىڭ ارتقى ىعىسۋىنا ىقپال ەتەدى دەپ سانالادى.
كوبىنەسە شۇڭعىما ءتارىزدى دەفورماسيا تىرەك-قيمىل اپپاراتىنىڭ باسقا اۋرۋلارىمەن، مىسالى، مارفان سيندرومىمەن بايلانىسى، دەفورماسيانىڭ بەلگىلى ءبىر دارەجەسى دانەكەر ءتىنىنىڭ اۋىتقۋلارىنا بايلانىستى ەكەنىن كورسەتەدى. گەنەتيكالىق دەتەرمينيزم سونىمەن قاتار شوقى ءتارىزدى دەفورماسياسى بار ناۋقاستاردىڭ 40% -ىندا كەزدەسەدى.
كەۋدە قۋىسى دەفورماسياسىنىڭ بەلگىلەرى:
· ءتوس جانە قابىرعالاردىڭ سىرت كوزگە بايقالىپ تۇراتىن پاتولوگيالىق وزگەرىستەرى؛
· جۇرەك-قان تامىرلارى بۇزىلىستارى؛
· تىنىس الۋدىڭ قيىنداۋى؛
· سالماقتىڭ ازايۋى؛
· ارتەريالدى قان قىسىمىنىڭ كوتەرىلۋى؛
· شامادان تىس تەرشەڭدىك.
سونداي-اق، بريفينگ بارىسىندا مامان وتا قالاي جاسالاتىنىن، وپەراسيادان كەيىنگى قالپىنا كەلتىرۋ قانشا ۋاقىتقا سوزىلاتىنىن جانە مۇنداي حيرۋرگيالىق ارالاسۋلاردىڭ كىمدەرگە قارسى كورسەتىلىمدەرى بار ەكەنىن ايتتى. دارىگەرلەر ەرتە جاستا وتا جاساۋعا كەڭەس بەرەدى. بالالاردا قالپىنا كەلۋ تەزىرەك جانە وڭايىراق جۇرەدى.
«ەشقانداي قارسى كورسەتىلىمدەر جوق. ەگەر ءسىز شارا قولدانباساڭىز، بۇل كەۋدەنىڭ باسىپ تۇرۋى سالدارىنان ىشكى ورگانداردىڭ جۇمىسىنىڭ بۇزىلۋىنا اكەلۋى مۇمكىن. ناسسا وپەراسياسى - بۇل شۇڭعىما ءتارىزدى كەۋدە دەفورماسياسىن جويۋعا ارنالعان، از ءينۆازيۆتى ءادىستى قولداناتىن حيرۋرگيالىق ارالاسۋ. دەفورماسيانى تۇزەتۋ تەحنولوگياسى ءۇش كەزەڭدى قامتيدى: پلاستينانى سالۋ، ونى تاعىپ ءجۇرۋ كەزەڭى جانە پلاستينانى الۋ»، - دەدى سپيكەر.
18 جاسقا دەيىنگى بالالار مەملەكەت ەسەبىنەن ساقتاندىرىلعان جانە تەگىن مەديسينالىق كومەك الا الادى.