13 مامىردا استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا "اتامەكەن" ۇلتتىق كاسىپكەرلەر پالاتاسىنىڭ بۇرىنعى باسشىسى ابىلاي مىرزاحمەتوۆقا قاتىستى قىلمىستىق ءىس قارالدى. ول اسا ءىرى مولشەردە الاياقتىق جاسادى دەگەن كۇدىكپەن ۇستالعان، دەپ حابارلايدى almaty-akshamy.kz.
سوتتا مىرزاحمەتوۆتىڭ 2022 جىلى مامىر ايىنان قازانعا دەيىنگى ارالىقتا ب.-عا اعاسىن قاماۋدان بوساتۋ جانە وعان قاتىستى سوتقا دەيىنگى ءىس جۇرگىزۋدى توقتاتۋ ماسەلەسىن شەشۋگە مۇمكىندىگىنىڭ بار ەكەندىگىن ايتقانى انىقتالدى. ول اقشالاي سىياقى ءۇشىن مەملەكەتتىك جانە قۇقىق قورعاۋ ورگاندارىنىڭ جوعارى لاۋازىمدى تۇلعالارى ارقىلى بۇل ماسەلە شەشىلەتىنىن جەتكىزگەن. اقىرىندا الداۋ جانە سەنىمدى تەرىس پايدالانۋ ارقىلى الاياقتىق جولمەن فورمالدى تۇردە قارىز شارتتارىن رەسىمدەي وتىرىپ، ب.-نىڭ اسا ءىرى مولشەردە 13،9 ملرد تەڭگەسىن جىمقىرعان.
سوتتالۋشى كىناسىن مويىنداپ، ءادىل جازا تاعايىنداۋدى سۇرادى.
"سوت ۇكىمىمەن مىرزاحمەتوۆ اسا ءىرى مولشەردە الاياقتىق جاساعانى ءۇشىن كىنالى دەپ تانىلىپ، جەرگىلىكتى ءوزىن-وزى باسقارۋ ورگاندارىندا جانە كۆازيمەملەكەتتىك سەكتور سۋبەكتىلەرىندە 10 جىل مەرزىمگە قىزمەت اتقارۋ قۇقىعىنان ايىرىلا وتىرىپ، مەملەكەت كىرىسىنە قىلمىستىق جولمەن الىنعان 5،8 ملرد تەڭگە سوماسىندا اقشا قاراجاتى تاركىلەنىپ، 5 جىلعا باس بوستاندىعىنان ايىرىلدى"، - دەپ جازدى استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى.
سوت ق ر قك-نىڭ 49-بابىنىڭ 2-بولىگى نەگىزىندە ق ر پرەزيدەنتىنە مىرزاحمەتوۆتى "قۇرمەت" جانە 3-دارەجەلى "بارىس" وردەنى سىندى مەملەكەتتىك ناگرادالارىنان ايىرۋ تۋرالى ۇسىنىس ەنگىزدى.
مىرزاحمەتوۆتىڭ مۇلكىنە سالىنعان تىيىم ءوز كۇشىندە قالدىرىلدى.
سوت ۇكىمى زاڭدى كۇشىنە ەنگەن جوق.