قازاقستاندا جۇمىس ساپارىمەن جۇرگەن ەۋروپا كەڭەسى ۆەنەسيالىق كوميسسياسىنىڭ ءتورايىمى كلەر بازي-مالوري حانىم 10 قىركۇيەكتە اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە بولىپ، «قۇقىقتىق ديالوگ» حالىقارالىق ءىس-شاراسىنا قاتىستى.
مارتەبەلى مەيمان القالى وتىرىستا الەمدىك دەڭگەيدەگى ادام قۇقىعىنا بايلانىستى پىكىرىلەرىن ورتاعا سالىپ، قۇقىقتىق مەملەكەت قۇرۋداعى قازاقستان باستامالارىنا جوعارى باعا بەردى، - دەپ حابارلايدى Aqshamnews.kz.
ق ر پرەزيدەنتى جانىنداعى ادام قۇقىقتارى جونىندەگى كوميسسيانىڭ ءتوراعاسى يگور روگوۆ «قۇقىقتىق ديالوگتىڭ» مودەراتورى رەتىندە باسقوسۋدى كلەر بازي-مالوريگە «قازاقستان رەسپۋبليكاسىنىڭ كونستيتۋسياسىنا 30 جىل» مەرەيتويلىق مەدالىن تاپسىرۋدان باستاپ، قۇرمەتتى قوناققا دەگەن ەلىمىزدىڭ ىستىق ىقىلاسىن جەتكىزدى. ال سالتاناتتى جيىندى قۇتتىقتاۋ سوزىمەن اشقان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ باسقارما توراعاسى-رەكتور بولات تىلەپ مۇنداي ديالوگتىڭ قازاقستان ءۇشىن اسا ماڭىزدى ەكەنىنە توقتالىپ، ادام قۇقىقتارى جونىندەگى ءىس-شاراعا ساتتىلىك تىلەدى.
حالىقارالىق شارانى ق ر پرەزيدەنتى جانىنداعى ادام قۇقىقتارى جونىندەگى كوميسسيا، اباي اتىنداعى قازۇپۋ جانىنداعى سوربوننا-قازاقستان ينستيتۋتى جانە لوتارينگيا ۋنيۆەرسيتەتىنىڭ فيليالى مەن فرانسيانىڭ قازاقستانداعى ەلشىلىگى ۇيىمداستىردى. ديالوگ جۇمىسىنا ق ر كونستيتۋسيالىق سوتى، جوعارعى سوتى، باس پروكۋراتۋراسى، ادىلەت مينيسترلىگى، ىشكى ىستەر مينيسترلىگى، پارلامەنتتىڭ زاڭناما جانە قۇقىقتىق رەفورما كوميتەتتەرى، ق ر ادام قۇقىقتارى جونىندەگى ۋاكىل، ق ر ءسىم الماتىداعى وكىلدىگى، سونداي-اق بۇۇ وكىلدەرى، فرانسيانىڭ جەتەكشى زاڭگەرلەرى جانە ەلىمىزدىڭ عىلىمي قاۋىمداستىعى قاتىستى.
ق ر ادىلەت ءمينيسترى ەرلان سارسەمبايەۆ «Zoom» پلاتفورماسى ارقىلى ءسوز سويلەپ، قازاقستاننىڭ قۇقىقتىق جۇيەسىن دامىتۋداعى حالىقارالىق ىنتىماقتاستىقتىڭ رولىنە توقتالسا، فرانسيانىڭ قازاقستانداعى توتەنشە جانە وكىلەتتى ەلشىسى سيلۆان گيوگە، اباي اتىنداعى قازۇپۋ سوربوننا-قازاقستان ينستيتۋتىنىڭ ديرەكتورى، ق ر پرەزيدەنتى جانىنداعى ادام قۇقىقتارى جونىندەگى كوميسسيا ءتوراعاسىنىڭ ورىنباسارى اينۇر ءسابيتوۆا بايانداما جاسادى.
قازاقستانعا جۇمىس ساپارىمەن كەلگەن ەۋروپا كەڭەسىنىڭ ۆەنەسيالىق كوميسسياسىنىڭ ءتورايىمى كلەر بازي-مالوري ءوز بايانداماسىندا كونستيتۋسيالىق باقىلاۋدىڭ زاماناۋي تاجىريبەسىن تالداپ، ادام قۇقىقتارىن قورعاۋداعى حالىقارالىق ستاندارتتاردىڭ ماڭىزىنا ەرەكشە توقتالدى. ونىڭ ايتۋىنشا، قازاقستان كونستيتۋسياسىنىڭ 30 جىلدىعى تەك ەل ءۇشىن عانا ەمەس، بۇكىل ايماق ءۇشىن دەموكراتيالىق قۇندىلىقتار مەن قۇقىقتىق مەملەكەت قاعيداتتارىن جاڭاشا تۇسىنۋگە مۇمكىندىك بەرەتىن ماڭىزدى بەلەس.
ەلشى سيلۆان گيوگە قازاقستان مەن فرانسيا اراسىنداعى ءبىلىم، مادەنيەت جانە قۇقىق سالاسىنداعى ىنتىماقتاستىقتى جوعارى باعالاپ، مۇنداي حالىقارالىق قۇقىقتىق ديالوگتىڭ زاڭ ۇستەمدىگىن نىعايتىپ قانا قويماي، جاستارعا الەمدىك تاجىريبەدەن ۇيرەنۋگە جول اشاتىنىن جانە ەكى ەلدىڭ زاڭ سالاسىنداعى سەرىكتەستىگىن ودان ءارى تەرەڭدەتۋگە ىقپال ەتەتىنىن اتاپ ءوتتى.
جيىن سوڭىندا ۋنيۆەرسيتەت ستۋدەنتتەرى حالىقارالىق ساراپشىلارعا كوكەيدە جۇرگەن سۇراقتارىن قويىپ، پىكىر الماستى. وسىلايشا، حالىقارالىق «قۇقىقتىق ديالوگ» الاڭى قازاقستانداعى قۇقىقتىق مادەنيەتتى نىعايتىپ، زاڭنامالىق قۇندىلىقتاردى ىلگەرىلەتۋگە باعىتتالعان ماڭىزدى باستاما رەتىندە ءوز ماڭىزىن ايقىندادى.