ق ر پارلامەنتى سەناتىنىڭ ءتوراعاسى ماۋلەن اشىمبايەۆ قازاقستاندىقتاردى اباي كۇنىمەن قۇتتىقتادى، دەپ حابارلايدى Almaty-akshamy.kz.
«قۇرمەتتى دوستار!
بارشاڭىزدى اباي كۇنىمەن شىن جۇرەكتەن قۇتتىقتايمىن!
اباي – تۇتاس حالقىمىزدىڭ رۋحاني تەمىرقازىعىنا اينالعان ۇلى ويشىل. ۇلتتىق بولمىسىمىز بەن ادامي دامۋىمىزعا باعدار بولعان بىرەگەي تۇلعا. سوندىقتان مەملەكەت باسشىسى قاسىم-جومارت كەمەل ۇلى توقايەۆتىڭ @tokayev_online باستاماسىمەن 10 تامىز «اباي كۇنى» دەپ بەلگىلەنگەن بولاتىن.
ۇلى عۇلامانىڭ مۇراسى – قانشا ۋاقىت وتسە دە سىنى كەتپەيتىن، سىرى تاۋسىلمايتىن باعالى قازىنا. ابايدىڭ ءوزى ءحىح عاسىردا ءومىر سۇرسە دە، جاڭا زاماننىڭ ادامىمەن رۋحاني ۇندەس تۇلعا ەكەنى ءسوزسىز. ويتكەنى دۇرىس قۇندىلىقتارعا تابان تىرەگەن، بىلىكتى، وتانشىل، جاناشىر ازامات بولىپ قالىپتاسۋ ءۇشىن ويشىلدىڭ «تولىق ادام» تۇجىرىمىن باعدار ەتۋ قازىرگى تاڭدا دا اسا ماڭىزدى.
پرەزيدەنتىمىز اقىندى ۇلتتىق سانانى جاڭعىرتۋعا زور ىقپال ەتكەن رۋحاني رەفورماتور دەپ اتاعانى بەلگىلى. شىن مانىندە، اباي حالقىمىزدىڭ ءبىتىم-بولمىسىن زەردەلەپ، تەرەڭ ۇعىنىپ، ونى ۋاقىت تالابىنا ساي شىڭداۋدىڭ فورمۋلاسىن ۇسىندى. سونىمەن بىرگە، ادامي اسىل قاسيەتتەردى دارىپتەپ، الەمدىك ويدىڭ بيىگىنە كوتەرىلدى. سوندىقتان ابايدىڭ مۇراسى ۇلتىمىزبەن قوسا جاھان جۇرتى ءۇشىن دە قۇندى ءارى ءقادىرلى.
مۇنىڭ ءبارى اقىننىڭ اسىل مۇراسىن ەلىمىزبەن بىرگە شەتەلدەردە دە دارىپتەۋدىڭ ماڭىزى زور ەكەنىن كورسەتەدى. «اباي كۇنى» – وسى ماقساتتى كوزدەيتىن رۋحاني مەرەكە. سوندىقتان الەمنىڭ قاي تۇكپىرىندە جۇرسەك تە ويشىلدىڭ وسيەتتەرى مەن ولەڭدەرىنەن تاعىلىم الىپ، ونى ناسيحاتتاعانىمىز ابزال.
ابايدىڭ ۇلاعاتى – ءاربىر ازاماتىمىز ۇمتىلۋعا ءتيىس بيىك بەلەس. سول بيىكتە بارشامىزدىڭ باسىمىز بىرىكسىن. ەلىمىز امان، جۇرتىمىز تىنىش بولسىن!»، دەلىنگەن سەنات ءتوراعاسىنىڭ قۇتتىقتاۋ حابارلاماسىندا.