اباي وبلىسىنىڭ بورودۋليحا اۋدانىنداعى ءورتتى ءسوندىرۋ اۋا رايىنىڭ قولايسىزدىعىنا بايلانىستى قيىنداپ كەتتى.
اباي وبلىسى اكىمىنىڭ ورىنباسارى ديميتريي گاريكوۆ اتاپ وتكەندەي، گەوگرافيالىق جاعداي دا وتە قيىن، سەبەبى جەر بەتىندەگى اۋىر تەحنيكا قۇم توبەلەرىنەن ارەڭ وتەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سونداي-اق، ديميتريي گاريكوۆ العاشقى ءورتتى سوندىرۋگە تەحنيكا جەتكەنشە ءورت اۋماعى شامامەن 20 گەكتاردى قۇراعانىن ايتتى.
«8 ماۋسىم كۇنى ساعات 12:03-تە سەمەي قالاسىنان 25 شاقىرىمداي قاشىقتىقتاعى باتپايەۆ ورمان شارۋاشىلىعىنىڭ 66 كۆارتالىندا ءورت شىققانى تۋرالى حابار ءتۇستى. ءورت نايزاعايدىڭ 2 رەت سوعۋىنان شىققان. ءورتتى تەز ارادا اۋىزدىقتاۋ مۇمكىن بولمادى، وعان سەبەپ «سەمەي ورمانى» مەمەلەكەتتىك ورمان تابيعي رەزەرۆاتى تەحنيكاسى بيىك قۇم توبەلەرى ورنالاسقان ايماققا جەتە المادى. ءورت ورمان شارۋاشىلىعى ورنالاسقان جەردەن قاشىقتىعى 11 شاقىرىمدى السا، تەحنيكا جەتكەنشە ءورت اۋماعى 20 گەكتاردى قۇرادى. جوعارى تەمپەراتۋرا مەن قاتتى جەلدىڭ سالدارىنان ءورت ەكى ساعاتتىڭ ىشىندە 200 گەكتار اۋماقتى شارپىدى»، - دەدى ديميتريي گاريكوۆ.
ورمان ءورتى ۋسپەن، پودنەبەسنوە، بارىشيەۆكا اۋىلدارىنا ءقاۋىپ توندىرەتىندىكتەن، تۇرعىندار جەدەل تۇردە ەۆاكۋاسيالاندى. بارلىعى 316 ادام ءقاۋىپسىز جەرگە كوشىرىلدى.
قوعامدىق ءتارتىپ پەن تۇرعىنداردىڭ مۇلكىن قورعاۋ ءۇشىن وقيعا ورنىندا اۋداندىق ىشكى ىستەرى ءبولىمى قىزمەتكەرلەرىنىڭ كەزەكشىلىگى ۇيىمداستىرىلدى.
قازىرگى ۋاقىتتا بورودۋليحا تۇرعىندارىنا ءقاۋىپ ءتونىپ تۇرعان جوق.
«ءورت 30 مىڭ گەكتارعا جۋىق اۋماقتى قامتىدى. ءورت سالدارىنان باتپايەۆ، كامىشەن جانە ۋسپەن ورمان شارۋاشىلىقتارى زارداپ شەكتى. تۇندە ەۆاكۋاسيا ۋسپەن، گرۋشوۆكا جانە پودنەبەسنوە اۋىلدارىندا جۇرگىزىلدى. ەلدى مەكەندەر اۋماعىنداعى تۇرعىن ۇيلەردىڭ سانى 200-گە جۋىق. بارىشوۆكا اۋىلىندا ءبىر تۇرعىن ەمەس جانە 2 تۇرعىن ءۇي ورتتەن زارداپ شەكتى» ، - دەپ قوستى وبلىس اكىمىنىڭ ورىنباسارى.
بۇگىندە ءورت ورنىندا 600-دەن استام ادام، 168 تەحنيكا، 6 تىكۇشاق جۇمىس ىستەپ جاتىر. كولەمى 154 توننا بولاتىن 55-تەن استام سۋ شاشىلدى.
باتپايەۆ، كامىشەن جانە ۋسپەن ورمان شارۋاشىلىقتارىنىڭ «سەمەي ورمانى» مەملەكەتتىك ورمان تابيعي رەزەرۆاتى اۋماعىنداعى ءورت ودان ءارى جايىلىپ جاتىر.
قازىرگى ۋاقىتتا 3 ءورت وشاعى قالدى: باتىس بولىگىندە (كامىشەن ورمان شارۋاشىلىعى كامىشەنكا اۋىلى ماڭىندا)، سونداي-اق كاشتاك باعىتىندا جانە جەدەل شتاب ورنالاسقان ۋسپەن اۋىلىندا ءورت ءورشىدى.
ءورتتىڭ تارالۋىنا جول بەرمەۋ ءۇشىن قىزمەتكەرلەر ورمان اۋماعىن كۇزەتىپ ءجۇر.
قازىرگى ۋاقىتتا اۋا تەمپەراتۋراسى شامامەن 30 گرادۋستى قۇرايدى، بۇل ءورتتى ءسوندىرۋدى ايتارلىقتاي قيىنداتادى، جەل باعىتىنىڭ وزگەرۋى جانە ءورتتىڭ جايىلىپ، تارالۋى بارلىق باعىتتا جۇمىستى قيىنداتىپ وتىر.
اپات ورنىندا قازاقستان رەسپۋبليكاسى توتەنشە جاعدايلار مينيسترلىگىنىڭ ۆيسە-مينيسترى مارات كۇلدىكوۆ، قازاقستان رەسپۋبليكاسى توتەنشە جاعدايلار مينيسترلىگى ورتكە قارسى قىزمەت كوميتەتىنىڭ ءتوراعاسى نۇربولات دەربىسوۆ، اباي وبلىسى اكىمى نۇرلان ۇرانحايەۆ جانە باسقا دا بارلىق جاۋاپتى قىزمەتكەرلەر بولدى.