الماتىدا «ۇلى جىبەك جولى» بالەتىنىڭ پرەمەراسى ءوتتى.
اباي اتىنداعى قازاق ۇلتتىق وپەرا جانە بالەت تەاترىندا كورەرمەن كوپ جينالدى. جوعارى كلاسسيكالىق ونەردى باعالايتىن الماتىلىقتار مەن قالا قوناقتارى ايگەرىم ەركەبايەۆانىڭ مۋزىكاسىمەن قويىلعان ەكى ءبولىمدى «ۇلى جىبەك جولى» بالەتىن تاماشالاۋعا كەلدى. پرەمەرانىڭ يدەياسى، ليبرەتتوسى مەن حورەوگرافياسى قازاقستاننىڭ حالىق ءارتيسى گۇلجان تۇتكىبايەۆانىكى.
قويىلىم فيلوسوفيالىق پريچا مەن زاماناۋي مەتافورانى توعىستىرادى: سپەكتاكل سۋىق سيفرلىق بولاشاقتا، ادامدار بىر-بىرىنەن وقشاۋلانعان الەمدە باستالادى.
جاي عانا كەرۋەندى كورسەتۋ زاماناۋي كورەرمەنگە قىزىق ەمەس. بۇل جەردە ءوز كونسەپسياڭدى تابۋ ماڭىزدى. مەن جىبەك جولى داۋىرىنە الىس بولاشاقتىڭ پريزماسى ارقىلى قاراۋدى ءجون كوردىم، — دەيدى گۇلجان تۇتكىبايەۆا.
ونىڭ ايتۋىنشا، بالەت ءداستۇردىڭ قۇندىلىعى مەن ادام جۇرەگىنىڭ جىلۋى تۋرالى وي قوزعايدى.
ناعىز سەزىمدەردى ساقتاپ قالعان جىگىت زامانى وتكەن قارتقا جولىعادى. قارت ونى وتكەن شاققا — جاندانىپ تۇرعان شىعىس الەمىنە جەتەلەيدى: كەرۋەن-ساراي، بازار، ساۋداگەرلەر تىرشىلىگى. وسى جەردە ول پاكتىك سيمۆولى — اكسۇنقار قىزدى كەزدەستىرەدى. الايدا قيال-ەلەس بەينەسىندەگى ايناشى كوپەس قىزدى ۇرلاپ اكەتەدى.
ەكىنشى اكتىدە كەيىپكەر سىن-قاتەرلەردەن ءوتىپ، ءناپسى مەن ارباۋلارمەن كۇرەسىپ، ىشكى جارىعىن تابادى. ول انتاگونيستى جەڭگەنىمەن، اقسۇنكار جوعالىپ كەتەدى، تەك ساۋلەسى عانا قالادى. بولاشاق مەگاپوليسىنە ورالعان جىگىت وتكەننىڭ نۇرىن ادامدارعا اكەلەدى — قالا دا بىرتىندەپ جاندانا باستايدى.
اقسۇنكار پارتياسىنىڭ ورىنداۋشىسى جانەل تۇكەيەۆا ءوز كەيىپكەرى تۋرالى وي ءبولىستى:
بۇل — جارىق، جاس ءارى نازىك قىزدىڭ بەينەسى. جىگىت ونى بيلىك، بايلىق، ازعىرۋلاردان ءوتىپ ىزدەيدى. ول قىزدىڭ جانىن قۇتقارعانىمەن، كەش قالادى. سوعان قاراماستان، ءوز زامانىنا ادامگەرشىلىكتى قايتارادى. بالەرينانىڭ ايتۋىنشا، جوبا ونىڭ جۇرەگىنە جاقىن بولعان.
– مەن بۇل جۇمىسقا يدەيانىڭ تۋۋ ساتىنەن باستاپ قاتىستىم، — دەدى ول.
پرەمەرا ءداستۇر مەن زاماناۋيلىقتى توعىستىرعان جارقىن مادەني وقيعاعا اينالدى.