QS WUR by Subject 2022 الەمدىك رەيتينگىسىندە ۋنيۆەرسيتەت جوعارى ورىنداردان كورىندى
QS World University Rankings by Subject 2022 قورىتىندىسى بويىنشا اباي اتىنداعى قازاق ۇلتتىق پەداگوگيكالىق ۋنيۆەرسيتەتى (Abai University) العاش رەت پاندىك رەيتينگ بويىنشا كەڭ اۋقىمدى «الەۋمەتتىك عىلىمدار جانە مەنەدجمەنت» سالاسىنا كىرەتىن «ءبىلىم بەرۋ جانە وقىتۋ» ماماندىعى بويىنشا 62 ورىنعا يە بولىپ، الەمنىڭ العاشقى ءجۇز ۋنيۆەرسيتەتتەرىنىڭ قاتارىنا كىردى، دەپ حابارلايدى Almaty-akshamy.kz
بۇل كورسەتكىش رەيتينگتىڭ وسى ساناتىندا ۇسىنىلعان قازاقستاندىق عانا ەمەس، ورتالىق ازيا جوعارى وقۋ ورىندارىنىڭ اراسىنداعى ەڭ ۇزدىگى بولىپ تابىلادى. وسىلايشا، اباي ۋنيۆەرسيتەتى قازاقستاننىڭ پەداگوگيكالىق ءبىلىم بەرۋدىڭ فلاگمانى دەگەن اتاققا لايىقتى ەكەنىن تاعى دا دالەلدەدى.
QS World University Rankings by Subject 2022 قازىرگى تاڭدا الەمدەگى ەڭ بەدەلدى رەيتينگتەردىڭ ءبىرى بولىپ تابىلادى. ونىڭ نەگىزگى ماقساتى - ونەر جانە گۋمانيتارلىق عىلىمدار، تەحنولوگيا، ءومىر تۋرالى عىلىمدار جانە مەديسينا، جاراتىلىستانۋ عىلىمدارى، الەۋمەتتىك عىلىمدار جانە باسقارۋ سياقتى نەگىزگى بەس پانگە توپتاستىرىلعان ناقتى پاندەر بويىنشا جەتەكشى ۋنيۆەرسيتەتتەردى انىقتاۋ.
Abai University «ءبىلىم بەرۋ جانە وقىتۋ» سالاسىندا بۇرىن-سوڭدى بولماعان ىلگەرىلەۋشىلىك كورسەتىپ قانا قويماي، «ونەر جانە گۋمانيتارلىق عىلىمدار» سالاسىنداعى رەيتينگكە العاش رەت ەنىپ، جالپى 64،5 باللمەن 297ء-شى ورىنعا شىقتى. ەگەر وتكەن جىلى بۇل سالادا ۋنيۆەرسيتەت «اعىلشىن ءتىلى مەن ادەبيەتى» ماماندىعى بويىنشا ۇسىنىلسا، بيىلعى جىلى «لينگۆيستيكا» ماماندىعى الەم بويىنشا 201-250 توپقا كىرىپ، العا شىعىپ وتىر (رەسپۋبليكاداعى جوو اراسىندا 3 ورىن). وسىلايشا، ۋنيۆەرسيتەت پاندىك رەيتينگتە تاعى ءبىر رەكورد ورناتىپ، وتكەن جىلعى ەكى پاندىك پۋلدى بيىل ۇشكە دەيىن ۇلعايتتى.
بيىلعى رەيتينگتى دايىنداۋ بارىسىندا QS ماماندارى دۇنيە ءجۇزى بويىنشا 1،5 مىنان استام جوعارى وقۋ ورنىنا ساراپتاما جاسادى. ۋنيۆەرسيتەتتەر 51 ماماندىق بويىنشا 5 كەڭ اۋقىمدى پاندىك سالاعا توپتاستىرىلعان. بيىلعى رەيتينگتىڭ ەرەكشەلىگى «حالىقارالىق زەرتتەۋ جەلىسى» ينديكاتور رەتىندە قاراستىرىلدى.
تاۋەلسىز جانە وبەكتيۆتى QS World University Rankings by Subject رەيتينگى ۋنيۆەرسيتەتتىڭ حالىقارالىق ارەناداعى اكادەميالىق بەدەلىنىڭ ءوسۋىن راستايدى.