اكادەميك ىندەتتەن قۇتىلۋدىڭ جالعىز جولى ۆاكسينا سالدىرۋ ەكەنىن ايتتى.
26 تامىز كۇنى تانىمال قازاقستاندىق تۇلعا، مەديسينا عىلىمدارىنىڭ دوكتورى، پروفەسسور تورەگەلدى شارمانوۆ COVID-19-عا قارسى ەكپە سالدىردى، دەپ حابارلايدى Almaty-akshamy.kz.
اكادەميك ءوزىنىڭ ەكپە سالدىرعانى تۋرالى الەۋمەتتىك جەلىلەردە كورسەتتى. ونىڭ پىكىرىنشە، ىندەتتەن قۇتىلۋدىڭ جالعىز جولى ۆاكسينا سالدىرۋ بولىپ تابىلادى.
«بۇگىن الەمدى جايلاعان ءبىر ينفەكسيا بار. وتە ءقاۋىپتى ىندەت. ول – كوروناۆيرۋس ينفەكسياسى. بۇدان ساقتانۋدىڭ ءبىر-اق جولى بار، ول – بەتپەردە تاعۋ، ۆاكسينا سالدىرۋ. مەن 90-نان اسىپ بارا جاتىرمىن. ۆاكسينا سالدىردىم. ەشقانداي ءقاۋىپ جوق، ۇيقىم جاقسى. ءقاۋىپتى ىندەتتەن ساق بولۋ ءۇشىن ۆاكسينا سالدىرىڭىز. ۆاكسينا سالدىرۋ ارقىلى ادام ءوزىن جانە جاقىندارىنىڭ ءومىرىن ساقتايدى»، – دەدى تورەگەلدى شارمانوۆ.
سونىمەن قاتار عالىم قازاقستاندىقتارعا ۆاكسينا تۋرالى جالعان جاڭالىقتارعا سەنبەۋ كەرەكتىگىن ەسكەرتتى.
«ءقازىر «ۆاكسينا ءقاۋىپتى» دەگەن جالعان اقپارات تاراتىلىپ جاتىر. سەنبەڭىز، ۆاكسينا –بۇل قورعانۋدىڭ جالعىز جولى جانە جاقىن ادامدارىڭىزبەن بىرگە بولۋدىڭ جالعىز مۇمكىندىگى»، - دەدى اكادەميك.