بۇگىن وسى كاسىبي مەرەكەگە وراي ق ر ەكولوگيا، گەولوگيا جانە تابيعي رەسۋرستار مينيسترلىگىندە سالتاناتتى جيىن ءوتتى.
ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعالييەۆ سۋ سالاسى قىزمەتكەرلەرىن، ارداگەرلەردى كاسىبي مەرەكەسىمەن قۇتتىقتادى، دەپ حابارلايدى Almaty-akshamy.kz اتالعان مينيسترلىكتىڭ باسپا ءسوز قىزمەتىنە سىلتەمە جاساپ.
ەسكە سالا كەتسەك، بۇل كاسىبي مەرەكە قازاقستان رەسپۋبليكاسىنداعى مەرەكەلىك كۇندەردىڭ تىزبەسىن بەكىتۋ تۋرالى قازاقستان رەسپۋبليكاسى ۇكىمەتىنىڭ قاۋلىسى بويىنشا بەكىتىلگەن.
قۇتتىقتاۋ سوزىندە مينيستر مەملەكەت باسشىسىنىڭ سۋ سالاسىن دامىتۋ ماسەلەلەرىنە كوپ كوڭىل بولەتىنىن اتاپ ءوتتى. ءبىرقاتار ماڭىزدى ستراتەگيالىق مىندەتتەر قويىلعانىن ەسكە سالدى. مىسالى، پرەزيدەنت سۋارمالى جەر كولەمىن 2030 جىلعا دەيىن اعىمداعى 1،6 ملن. گەكتاردان 3 ملن. گەكتارعا دەيىن ۇلعايتۋ جونىندە تاپسىرما بەردى. سونداي-اق، اپاتتى سۋ قويمالارىن قالپىنا كەلتىرۋ، كانالداردى سيفرلاندىرۋ، توپتىق سۋ قۇبىرلارىن سالۋ قاراستىرىلعان.
«سىزدەر سۋ رەسۋرستارىن ۇتىمدى پايدالانۋ مەن قورعاۋدىڭ قازىرگى زامانعى تەحنولوگيالارىن قولدانا وتىرىپ، ولاردى بولاشاق ۇرپاق ءۇشىن ساقتاۋ ماقساتىنداعى مەملەكەتتىك ساياساتتى ىسكە اسىرۋدا جوعارى كاسىبي دەڭگەيدە قامتاماسىز ەتىپ كەلەسىزدەر. 2020 جىلى 813 كم كانال قايتا جاڭارتىلدى. بۇل 53،5 مىڭ گا سۋارمالى جەردى اينالىمعا ەنگىزۋگە، 26 مىڭ جۇمىس ورنىن قۇرۋعا جانە اۋىل شارۋاشىلىعى ءونىمىنىڭ كولەمىن 30 ملرد.تەڭگەدەن استام سوماعا ۇلعايتۋعا مۇمكىندىك بەردى. بيىل 78 مىڭ گا سۋارمالى جەردى اينالىمعا ەنگىزۋ ءۇشىن 1050 كم يرريگاسيالىق جەلىنى قالپىنا كەلتىرۋ جوسپارلانعان. بۇل جىل سايىن 66 ملرد. تەڭگەگە اۋىل شارۋاشىلىعى ونىمدەرىن وندىرۋگە جانە 16 مىڭ تۇراقتى جۇمىس ورنىن قۇرۋعا مۇمكىندىك بەرەدى»، - دەدى مينيستر.
سونداي-اق، مينيستر سۋدى ساپالى جانە ءتيىمدى پايدالانۋ ماقساتىندا 2020 جىلى تۇركىستان وبلىسىندا ۇزىندىعى 12 كم ماگيسترالدىق ارنانى سيفرلاندىرۋ بويىنشا پيلوتتىق جوبا ىسكە اسىرىلعانىن ەسكە سالدى. بۇل سۋارمالى سۋدىڭ ارتىق شىعىنىن انىقتاۋعا مۇمكىندىك بەردى. تاياۋداعى 5 جىل ىشىندە ۇزىندىعى 2،8 مىڭ شاقىرىمنان اساتىن 119 ارنانى سيفرلاندىرۋ جوسپارلانىپ وتىر.
سالتاناتتى جيىندا سۋ شارۋاشىلىعى قىزمەتكەرلەرى اراسىندا «سۋ شارۋاشىلىعىنىڭ ارداگەرى» اتانعاندار، «سۋ شارۋاشىلىعىنىڭ ۇزدىگى» توسبەلگىسىن تاققاندار جانە قۇرمەت گراموتاسىمەن ماراپاتتالعاندار دا بولدى.