ولاردى پوليسيا ساقشىلارى اۆتوبۋسقا وتىرعىزعان، اۆتوبۋس وزبەكستان رەسپۋبليكاسىنىڭ شەكاراسىنا دەيىن بارادى.
الماتىدا زاڭسىز جۇرگەن وزبەكستان ازاماتتارى ءوز ەلىنە قايتارىلدى، دەپ حابارلايدى Almaty-akshamy.kz.
ىشكى ىستەر مينيسترلىگىنىڭ رەسمي سايتىنداعى دەرەك بويىنشا، 5-12 شىلدە ارالىعىندا قالا اۋماعىندا «نەلەگال» جەدەل الدىن الۋ ءىس-شاراسى وتكىزىلۋدە. ءىس-شارانىڭ ماقساتى – قوعامدىق ءتارتىپتى ساقتاۋ، شەتەلدىك ازاماتتاردىڭ قازاقستان رەسپۋبليكاسىندا بولۋ ەرەجەلەرىن بۇزۋىن انىقتاۋ، سونداي-اق، زاڭسىز كوشى-قون ارنالارىن، شەتەلدىكتەردى زاڭسىز جۇمىسپەن قامتۋ فاكتىلەرىن انىقتاۋ.
«ق ر كونسۋلدىعى جانە پوليسيا دەپارتامەنتىنىڭ كۇشىمەن ۇستالعان ازاماتتار اۆتوبۋسقا وتىرعىزىلدى، ولار وزبەكستان رەسپۋبليكاسىنىڭ شەكاراسىنا دەيىن بارادى. بارلىق ەلدەن شىعارىلعاندارعا كونسۋلدىقتان ءوز ەلدەرىنە ورالۋ تۋرالى كۋالىكتەر بەرىلدى. شىعارىلعانداردىڭ اراسىندا بىرنەشە جىل بۇرىن سوت شەشىمىمەن ۇيىنە قايتۋ كەرەك بولعان، ءبىراق بەلگىلى ءبىر سەبەپتەرمەن قايتا الماعان، قاراجاتى مەن قۇجاتتارى جوق ازاماتتار دا بار. سوندىقتان، وزبەكستان كونسۋلدىعى ولاردى قۇجاتتاندىرىپ، جەكە باسىن كۋالاندىراتىن قۇجاتتارىن بەردى»، – دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ.