وتكەن جىلى 8 903 ادام ءوز ەركىمەن سولتۇستىككە قونىس اۋداردى.
ونىڭ ىشىندە قونىس اۋدارۋشىلار — 6 492، قانداستار — 2337 ادام. بارىنە مەملەكەتتىك قولداۋ شارالارى كورسەتىلدى، دەپ حابارلايدى اlmaty-akshamy.kz.
ەڭبەك كۇشى تاپشى وڭىرلەرگە قونىس اۋدارۋ مۇمكىندىگىن پايدالانعان قازاقستاندىقتار ءوز ومىرىندەگى وڭ وزگەرىستەردى اتاپ ءوتتى.
سونىڭ ءبىرى — قۇرالاي ماساتبايەۆا. ول وتباسىمەن 2021 جىلى استانادان سولتۇستىك قازاقستان وبلىسىنىڭ تايىنشا قالاسىنا كوشىپ كەلدى.
«كوشكەننەن كەيىن وتباسىمىزعا 612 570 تەڭگە سوماسىندا كوشۋگە ماتەريالدىق كومەك بەرىلدى، سونداي-اق بىزگە قالادان مەملەكەتتىك جالعا بەرىلەتىن تۇرعىن ءۇي بەرىلدى»، - دەيدى ول.
قۇرالاي ماساتبايەۆانىڭ «باستاپقى اسكەري دايىندىق» ماماندىعى بويىنشا جوعارى ءبىلىمى بار.
وتكەن جىلى 1 ملن 380 مىڭ تەڭگە سوماسىنا مەملەكەتتىك گرانت الىپ، شاعىن كونديتەرلىك دۇكەنىن اشتى.
«دەكرەتتىك دەمالىستا ۇيدە ءوز ءىسىمدى اشۋدى، بالالاردىڭ قاسىندا بولۋدى ارماندايتىنمىن. تايىنشا اۋدانىنىڭ جۇمىسپەن قامتۋ ورتالىعىنا بارىپ، قايتارىمسىز گرانت تۋرالى ءبىلدىم. قونىس اۋدارۋشى بولعاندىقتان قايتارىمسىز گرانت بەرىلەتىندەر ساناتىنا كىرەتىنىمدى ايتىپ، بارلىق سۇراقتار بويىنشا كەڭەس بەرىلدى. وسىنداي مۇمكىندىكتى بوس جىبەرمەي، ءوزىمنىڭ بيزنەس-جوسپارىمدى قورعاپ، مەملەكەتتەن گرانت الدىم»، - دەپ ءبولىستى كاسىپكەر كەلىنشەك.
ۇلتتىق جوبا اياسىنداعى مەملەكەتتىك قولداۋ شارالارى:
- كوشۋگە ارنالعان سۋبسيديا –وتاعاسىنا جانە وتباسىنىڭ ءاربىر مۇشەسىنە 70 اەك مولشەرىندە ءبىرجولعى كومەك؛
- وتباسى مۇشەلەرىنىڭ سانى مەن ەلدى مەكەنگە بايلانىستى 15-تەن 30 اەك-كە دەيىنگى مولشەردە 12 اي ىشىندە تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە اي سايىنعى سۋبسيديالاۋ؛
- قىسقا مەرزىمدى كاسىپتىك وقىتۋعا جىبەرۋ؛
- جۇمىسقا ورنالاسۋعا نەمەسە كاسىپكەرلىك باستامانى دامىتۋعا جاردەمدەسۋ؛
- ەكونوميكالىق ۇتقىرلىق سەرتيفيكاتتارىن بەرۋ.
بۇدان باسقا، ءوڭىرارالىق قونىس اۋدارۋعا جاردەم كورسەتەتىن جۇمىس بەرۋشىلەرگە تۇرعىن ۇيمەن قامتاماسىز ەتىلگەن جانە كەمىندە 2 جىل مەرزىمگە تۇراقتى جۇمىسقا قابىلدانعان ءاربىر قىزمەتكەر ءۇشىن 400 اەك مولشەرىندە جۇمىسقا ورنالاسۋعا ءبىرجولعى سۋبسيديا بەرىلەدى.
وتكەن جىلى بارلىق قونىس اۋدارعانداردىڭ ىشىندە 4 158 ادام ەڭبەككە جارامدى، ونىڭ 3 079-ى تۇراقتى جۇمىسقا ورنالاستىرىلعان، 164 ادام كاسىپكەرلىك قىزمەتپەن اينالىسسا، 35 ادام بيزنەس اشۋعا گرانت الدى.