ءبىلىم كونكۋرسىنا 80 ەلدەن 2200-گە جۋىق ۇمىتكەر قاتىسقان.
بيىل قازاقستاندا 801 قانداس جوعارعى وقۋ ورنىنا گرانتقا قابىلدانعان، دەپ حابارلايدى Almaty-akshamy.kz عىلىم جانە جوعارعى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
قازاقستان رەسپۋبليكاسىنىڭ ازاماتى ەمەس ۇلتى قازاق ادامدار ءۇشىن قابىلداۋ كۆوتاسىنىڭ مولشەرى 2012 جىلعى 28 اقپانداعى №264 قازاقستان ۇكىمەتىنىڭ قاۋلىسى بەكىتىلگەن.
"قاۋلى دياسپورا وكىلدەرىنە بەلگىلەنگەن كۆوتا شەگىندە ءبىلىم گرانتىن بەرۋ كونكۋرسىنا قاتىسۋعا مۇمكىندىك بەردى"، - دەيدى مينيسترلىكتىڭ باسپا ءسوز قىزمەتى.
مينيسترلىكتىڭ ايتۋىنشا، قازاقستاننىڭ جوعارى وقۋ ورىندارىنا گرانتقا تۇسۋگە جالپى 80 ەلدەن ءوتىنىم ءتۇسىپ، ءبىلىم كونكۋرسىنا 2200-گە جۋىق ۇمىتكەر قاتىسقان. بۇل كورسەتكىش جىل سايىن ارتىپ كەلەدى.
"ماسەلەن، بەلگىلەنگەن كۆوتا اياسىندا 2020 جىلى 910، 2021 جىلى 784، 2022 جىلى 654، 2023 جىلى 801 ادام قابىلداندى. وقۋعا كەلگەندەردىڭ باسىم كوپشىلىگى وزبەكستان، موڭعوليا، قحر-دان كەلگەن"، - دەيدى ۆەدومستۆو.
شەتەلدىكتەر ءۇشىن حالىقارالىق قاتىناستار بويىنشا ءبىلىم الۋعا 365 گرانت بەرىلگەن.
"شەتەلدىك ازاماتتاردىڭ، ونىڭ ىشىندە قازاقستان رەسپۋبليكاسىنىڭ ازاماتى ەمەس ۇلتى قازاق قانداستارعا 490 گرانت بەرىلدى. رەزەرۆتە 100 گرانت بار"، - دەيدى عىلىم جانە جوعارى ءبىلىم مينيسترلىگىنىڭ باسپا ءسوز جەتەكشىسى ەرجان بايتانايەۆ.
سونداي-اق ماگيستراتۋراعا 13 253، دوكتورانتۋراعا 1 890 گرانت ءبولىندى.
"قازاقستاندا ءتورتىنشى جىل قاتارىنان قازاقستان ازاماتى بولىپ سانالمايتىن ۇلتى قازاق ادامدارعا ارنالعان ستيپەنديالىق باعدارلاماعا ۇمىتكەرلەردى ىرىكتەۋ ءجۇرىپ جاتىر. بۇل باعدارلاما بويىنشا دا ۇمىتكەرلەر سانى ارتىپ كەلەدى. بيىلدىڭ وزىندە 6 024 ءوتىنىم ءتۇستى"، - دەيدى بايتانايەۆ.
مينيسترلىكتىڭ باسپا ءسوز مالىمەتىنە سايكەس، ستيپەنديالىق باعدارلاما جۇزەگە اسقاننان بەرى 10 مىڭنان استام ۇمىتكەر ءوتىنىم بەرگەن. بۇل باعدارلاما بويىنشا 139 ستيپەنديات قازاقستاندىق جوعارى وقۋ ورنىن ءتامامداپ، 538 ستۋدەنت قازىرگى كۇنى وقۋىن جالعاستىرىپ جاتىر.