الماتى وبلىسىنىڭ زارەچنىي كەنتىندە 8 پاتەرلى ءۇي ورتەنىپ كەتتى. وبلىس اكىمىنىڭ تاپسىرماسىمەن باسپانادان ايىرىلعان 24 ادام، ونىڭ ىشىندە 10 بالا قوناقۇيلەرگە ورنالاستىرىلاتىن بولادى. بۇل تۋرالى Almaty-akshamy.kz توتەنشە جاعدايلار مينيسترلىگىنە سىلتەمە جاساپ حابارلايدى.
«17 تامىز كۇنى ساعات 03:57-دە الماتى وبلىسىنىڭ توتەنشە جاعدايلار دەپارتامەنتىنىڭ ءورت ءسوندىرۋ بولىمشەلەرى قونايەۆ قالاسى زارەچنىي اۋىلىنداعى شكولنايا كوشەسىندە ورنالاسقان 8 پاتەرلى تۇرعىن ۇيدەگى ءورت بويىنشا شاقىرۋعا شىقتى.
ساعات 04:21-دە ءورت سوندىرۋشىلەر كەلگەن ۋاقىتتا ءۇيدىڭ شاتىرى مەن ەكىنشى قاباتى جانىپ، ارتىنشا شاتىر وپىرىلعانى انىقتالدى.
ءورت تۋرالى حابارلاما كەش تۇسكەندىكتەن ونى ءسوندىرۋ جۇمىستارى قيىندادى. قونايەۆ قالالىق ءورت ءسوندىرۋ بولىمىنەن وقيعا ورنىنا دەيىنگى قاشىقتىق 20 شاقىرىمدى قۇرايدى»، - دەلىنگەن اقپاراتتا.
قۇتقارۋشىلار كەلگەنگە دەيىن 15 ادام ءوز بەتىمەن ەۆاكۋاسيالانىپ ۇلگەرگەن، ونىڭ ەكەۋى جاراقات الدى.
جالىن ساعات 05:10-دا وقشاۋلاندىرىلىپ، ساعات 7:20-دا تولىقتاي جويىلدى.
وتتىڭ تۇتانۋ سەبەبى انىقتالىپ جاتىر. وقيعا ورنىنا الماتى وبلىسى توتەنشە جاعدايلار دەپارتامەنتىنەن 10 قىزمەتكەر مەن 3 تەحنيكا جۇمىلدىرىلدى.
«ورتكە قارسى قىزمەت ورگاندارىنىڭ قىزمەتكەرلەرى ءوز ءومىرىن قاۋىپكە تىگىپ، گاز باللوندارىن الىپ شىقتى.
الماتى وبلىسىنىڭ اكىمى مارات سۇلتانعازييەۆ ءورت ورنىنا بارىپ، زارداپ شەككەن تۇرعىندارمەن كەزدەستى (24 ادام، ونىڭ ىشىندە 10 بالا). قونايەۆ قالاسىنىڭ اكىمىنە زارداپ شەككەندەردى قونايەۆ قالاسىنداعى قوناقۇيگە ورنالاستىرۋدى تاپسىردى. جەرگىلىكتى اتقارۋشى ورگاندار زاڭنامادا بەلگىلەنگەن تارتىپتە ورتتەن زارداپ شەككەندەرگە كەلتىرىلگەن زالالدى وتەۋ جونىندە شارالار قابىلدايتىن بولادى»، - دەلىنگەن تجم مالىمەتىندە.
