الماتىدا كوشپەلى بۇلتتى، كەي ۋاقىتتا جاڭبىر، كەشكە قاتتى جاڭبىر جاۋىپ، نايزاعاي كۇتىلەدى
سينوپتيكتەر ەلىمىز بويىنشا 2023 جىلعى 8 ناۋرىزعا ارنالعان اۋا رايى بولجامىن ۇسىندى، دەپ حابارلايدى Almaty-akshamy.kz.
"قازگيدرومەت" رمك ۇسىنعان مالىمەت بويىنشا، ەل اۋماعىنىڭ باسىم بولىگى ءالى دە كاسپي تەڭىزى اۋدانىنان كەلگەن سيكلونىنىڭ ىقپالىندا بولادى، وسىعان بايلانىستى رەسپۋبليكانىڭ باسىم بولىگىندە جاۋىن-شاشىن بولادى.
قازاقستاننىڭ سولتۇستىگىندە، شىعىسىندا قاتتى جاۋىن-شاشىن (جاڭبىر، قار)، وڭتۇستىگىندە، وڭتۇستىك-شىعىسىندا كۇندىز قاتتى جاڭبىر جاۋادى. تەك ەلىمىزدىڭ باتىسى عانا انتيسيكلون جوتالارى اسەرىنەن جاۋىن-شاشىنسىز اۋا رايى بولجاندى.
رەسپۋبليكا بويىنشا جەل كۇشەيىپ، ەلىمىزدىڭ سولتۇستىك جارتىسىندا، شىعىسىندا، ورتالىعىندا جاياۋ بۇرقاسىن سوعادى، وڭتۇستىگىندە نايزاعاي وينايدى.
سونداي-اق تۇمان جانە كوكتايعاق كۇتىلەدى.
سولتۇستىك قازاقستان وبلىسىنىڭ وڭتۇستىگىندە تۇندە قاتتى قار جاۋادى، شىعىس قازاقستان وبلىسىنىڭ سولتۇستىگىندە، شىعىسىندا، اباي وبلىسىنىڭ سولتۇستىگىندە، تۇندە پاۆلودار وبلىسىنىڭ باتىسىندا، سولتۇستىگىندە جاۋىن-شاشىن (جاڭبىر، قار) كۇتىلەدى، كۇندىز الماتى وبلىسىنىڭ وڭتۇستىگىندە، تاۋلى اۋداندارىندا، تۇركىستان وبلىسىنىڭ سولتۇستىگىندە، وڭتۇستىگىندە، تاۋ جانە تاۋ بوكتەرلى اۋداندارىندا، جامبىل وبلىسىنىڭ سولتۇستىگىندە، باتىسىندا، وڭتۇستىگىندە، تاۋلى اۋداندارىندا قاتتى جاڭبىر بولادى.
پاۆلودار وبلىسىنىڭ وڭتۇستىگىندە، باتىسىندا، اباي وبلىسىنىڭ ورتالىعىندا، تۇندە اقمولا، قاراعاندى، شىعىس قازاقستان وبلىستارىنىڭ سولتۇستىگىندە، شىعىسىندا، تۇركىستان وبلىسىنىڭ تاۋ اسۋلارىندا وتە قاتتى جەل 30 م/س كۇتىلەدى.
استانا قالاسى: كوشپەلى بۇلتتى، تۇندە جانە تاڭەرتەڭ جاۋىن-شاشىن (كوبىنەسە قار) جاۋادى، جاياۋ بۇرقاسىن كۇتىلەدى. كوكتايعاق كۇتىلەدى. سولتۇستىك-باتىستان، باتىستان جەل سوعادى، كۇشى 9-14، تۇندە جانە تاڭەرتەڭ ەكپىنى 15-20 م/س. اۋانىڭ تەمپەراتۋراسى تۇندە جانە كۇندىز -2-4°س بولادى.
الماتى قالاسى: كوشپەلى بۇلتتى، كەي ۋاقىتتا جاڭبىر، كەشكە قاتتى جاڭبىر جاۋىپ، نايزاعاي كۇتىلەدى. وڭتۇستىك-شىعىستان جەل سوعادى، كۇشى 3-8، ەكپىنى 15-20 م/س. اۋانىڭ تەمپەراتۋراسى تۇندە +8+10°س، كۇندىز +18+20°س بولادى.
شىمكەنت قالاسى: كوشپەلى بۇلتتى، جاڭبىر، كۇندىز كەي ۋاقىتتا قاتتى جاڭبىر جاۋادى. وڭتۇستىك-باتىستان سوعاتىن جەل سولتۇستىك-شىعىسقا اۋىسادى، كۇشى 8-13، تۇندە ەكپىنى 15-20، كەي ۋاقىتتا 25 م/س. اۋانىڭ تەمپەراتۋراسى تۇندە جانە كۇندىز +13+15°س بولادى.