يراكتا ىشىمدىككە تىيىم سالىندى

يراكتا ەسىرتكىگە اۋەستەنۋشىلەر كوبەيۋى مۇمكىن

يراكتا الكوگولدىك ىشىمدىكتەرگە تىيىم سالۋ تۋرالى 2016 جىلى قابىلدانعان زاڭ كۇشىنە ەندى. ونىڭ نەلىكتەن كەش قولدانىلا باستاعانى بەلگىسىز، دەپ حابارلايدى Almaty-akshamy.kz.

كەيبىر پىكىرلەرگە ساي، جەتى جىل بۇرىنعىمەن سالىستىرعاندا، ءقازىر يسلام پارتيالارىنىڭ ىقپالى ارتقان. سوندىقتان، زاڭ ەندى عانا ارەكەت ەتە باستادى.

قۇجاتقا سايكەس، يمپورتتىق الكوگول ونىمدەرىنە تىيىم سالىنادى، ولاردى جەرگىلىكتى نارىقتا ساتۋعا نەمەسە وتاندىق ونىممەن الماستىرۋعا بولمايدى، دەپ جازادى qazaqstan.tv.

جاڭا زاڭدى حالىق جاپپاي قولداپ وتىرعان جوق. ءتىپتى ءبىرقاتار تۇرعىندار وسىنىڭ سالدارىنان يراكتا ەسىرتكىگە اۋەستەنۋشىلەر كوبەيۋى مۇمكىن دەپ الاڭدايدى.

«يراك – كوپ مادەنيەتتى، ەركىن ەل. ەكىنشى جاعىنان، الكوگولدى ساتۋعا جانە ىشۋگە تىيىم سالۋ ادامداردى بالاما ادىستەردى ىزدەۋگە ماجبۇرلەيتىنىن ءبارى بىلەدى، سونىڭ ىشىندە بيلىك باسىنداعىلار دا بۇدان حاباردار. دالىرەك ايتساق، ادامدار قايتادان ەسىرتكىگە نەمەسە ماريحۋاناعا جۇگىنۋى مۇمكىن. بۇل – وسى زاڭنىڭ جاعىمسىز سالدارلارى»، - دەدى باعداد تۇرعىنى ءالي اس-ساحەب.