ساعاتتى كورمەكشى بولعاندا جۇلىپ اكەتكەن
پاۆلوداردا 8 جاسار قىزدىڭ تەلەفونىن تارتىپ العان ەر ادام حالىقارالىق ىزدەۋدە جۇرگەن. كۇدىكتىنى پوليسيا قىزمەتكەرى ۇستاپ الدى، دەپ حابارلايدى Almaty-akshamy.kz پاۆلودار وبلىسى پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
بىرنەشە كۇن بۇرىن پاۆلودار قالاسىنداعى ساتبايەۆ كوشەسىندە ءوز اۋلاسىندا دوستارىمەن ويناپ جۇرگەن 8 جاسار قىز ۇيالى تەلەفونىن كۇرتەشەسىنىڭ قالتاسىنان الىپ، ساعاتتى كورمەكشى بولعان.
«كەنەتتەن وعان بەيتانىس جاس جىگىت جۇگىرىپ كەلىپ، تەلەفونىن قولىنان تارتىپ الىپ، قاشىپ كەتكەن. ۇيىنەن شىعىپ كەلە جاتقان پاترۋلدىك پوليسيا باتالونىنىڭ اعا ينسپەكتورى، لەيتەنانت ولجاس تىلەۋبەرگەنوۆ كىشكەنتاي قىزدىڭ كومەك سۇراپ ايقايلاعانىن ەستىگەن. بالا سوڭعى كىرەبەرىستىڭ تۇسىندا قاشىپ بارا جاتقان جىگىتتى كورسەتكەن»، - دەدى باسپا ءسوز قىزمەتىندە.
ولجاس تىلەۋبەرگەنوۆ دەرەۋ كۇدىكتىنىڭ ارتىنان جۇگىرىپ، ونى ۇستاپ العان. كەيىن «102» نومىرىنە قوڭىراۋ شالىپ، قىلمىسكەردى كەلگەن اۆتوپاترۋلگە تاپسىردى.
«توناۋشىنىڭ جەكە باسىن انىقتاعاننان كەيىن پوليسيا ونىڭ مەملەكەتارالىق ىزدەۋدە بولعانىن جانە سوتتان جاسىرىنىپ جۇرگەنىن انىقتادى. ءقازىر اتالعان فاكتى بويىنشا ق ر قك 191-بابى 1-بولىگى بويىنشا سوتقا دەيىنگى تەرگەۋ جۇرگىزىلۋدە»، - دەدى دەپارتامەنتتە.
دەپارتامەنتتىڭ حابارلاۋىنشا، لەيتەنانت تىلەۋبەرگەنوۆ ىشكى ىستەر ورگاندارىندا 2014 جىلدان بەرى قىزمەت ەتىپ كەلەدى. لايىقتى قىزمەتتەن باسقا، ول سپورتتىق شەبەرلىگى مەن تالانتىمەن دە ەرەكشەلەنەدى. قاجىرلى جاتتىعۋلار مەن شەبەرلىكتىڭ ارقاسىندا ءبىر اي بۇرىن ول قويان-قولتىق ۇرىستان ىشكى ىستەر مينيسترلىگىنىڭ چەمپيونى اتاندى.