الماتىلىق زەينەتكەر تاۋعا كۇن سايىن جاياۋ شىعادى
77 جاستاعى نيكولاي رەشەتوۆ زەينەتكە شىققاننان بەرى سالاۋاتتى ءومىر سالتىن ۇستانا باستاعان. جاس كۇنىندە بۇلاي شىنىقپاعان ول وسىلايشا ونىڭ ەسەسىن تولتىرماق. سوڭعى جەتى جىل بويى جاتتىعۋ ۇزبەي جاساپ كەلە جاتقان قاريا مەدەۋ مەن تەررەنكۋر بويىنشا ون شاقىرىمعا جۋىق جولدى ءجۇرىپ وتەدى، دەپ حابارلايدى Almaty-akshamy.kz
24.kz سايتىنىڭ اقپاراتىنا جۇگىنسەك، نيكولاي رەشەتوۆتىڭ ماماندىعى – دىبىس رەجيسسەرى. بۇكىل ەڭبەك جولى تەليەۆيدەنيە سالاسىندا ءورىلدى. رەسپۋبليكالىق تەلەارنالاردىڭ بىرىندە تابان اۋدارماستان ۇزاق جىل قىزمەت جاساپ، زەينەتكە شىقتى. كەزىندە جۇمىسباستى بولىپ، سپورتپەن اينالىسۋعا مۇلدەم ۋاقىتى بولماعان. ونىڭ ۇستىنە ءوزى دە نيەت ءبىلدىرىپ، مويىن بۇرماپتى. ءتىپتى ساياباقتا قىدىرۋعا ۋاقىت تابا الماعان. ال زەينەتكە شىققان سوڭ ءومىر سالتىن باسقا باعىتقا بۇردى. كۇن سايىن ونداعان شاقىرىمدى جاياۋ جۇرەدى. اسىرەسە، تاۋعا قاراي سەرۋەندەۋدى ادەتكە اينالدىرعان.
وسىدان ون جىل بۇرىن نيكولاي رەشەتوۆ ابايسىزدا اياعىن سىندىرىپ الادى. وعان وسى وقيعا دا قاتتى اسەر ەتەدى. جاراقاتى جازىلا باستاعان كەزدە دارىگەرلەر وعان كۇن سايىن از دا بولسا جاياۋ جۇرۋگە كەڭەس بەرەدى. سودان باستاپ ول كۇندەلىكتى ۇيىنەن مەدەۋگە دەيىن جاياۋ بارىپ، قايتاردا اۆتوبۋسپەن كەلەتىن. ءبىر كۇنى اۆتوبۋستان قالىپ قويعان سوڭ جاياۋ قايتۋىنا تۋرا كەلەدى. سودان بەرى الىس قاشىقتىقتى جەڭىل باعىندىرا باستايدى.
«كەزىندە جۇرۋگە ۋاقىتىم بولمادى... كەرىسىنشە، ءقازىر سونىڭ ورنىن تولتىرىپ جاتىرمىن. مەن بارىنە جاياۋ جۇرۋگە كەڭەس بەرەمىن. ءار نارسەنى سىلتاۋراتۋدىڭ قاجەتى جوق. ءومىر دەگەن قوزعالىس. قوزعالىس بار جەردە اۋرۋعا دا ورىن جوق»، - دەيدى قالا تۇرعىنى نيكولاي رەشەتوۆ.
نيكولاي رەشەتوۆتىڭ پايىمداۋىنشا، ءبىر ءىستى باستاپ كەتۋگە ەشقاشان كەش بولمايدى. نيكولاي رەشەتوۆتىڭ ۇستانىمى وسىنداي. ول جاياۋ ءجۇرىستىڭ ارتىقشىلىعىن اينالاسىنداعىلارعا ۇنەمى ايتىپ وتىرادى. سوڭعى كەزدە تاۋعا قىزى مەن نەمەرەسى دە بىرگە شىعىپ ءجۇر. زەينەتكەر ءقازىر سپورتپەن قوسا اعىلشىن ءتىلىن مەڭگەرۋدى قولعا العان.