تاۋەلسىز ەلدىڭ ءبىلىمدى ۇرپاعى
تاۋەلسىزدىكتىڭ 30 جىلدىعى قارساڭىندا الماتى قالالىق №178 مامانداندىرىلعان ليسەيىنىڭ 29 تۇلەگى «التىن بەلگى» يەگەرى اتانعان. ءدال ءقازىر وقۋ ورداسىندا 1672 وقۋشى ءبىلىم الىپ جاتىر. جاراتىلىستانۋ مەن ماتەماتيكا پاندەرى بويىنشا ليسەي اتىنان قاتىسقان 16 بالانىڭ ۇشەۋى رەسپۋبليكالىق كەزەڭگە جولداما الدى، دەپ حابارلايدى Almaty-akshamy.kz
«ءبىز بار كۇشىمىزدى ءار بالانىڭ بويىنداعى قاسيەتتەردى اشۋعا جۇمساپ، كوپ ەڭبەك ەتۋدەمىز. 33 جىل ەڭبەك جولىمدا تەك وسى فيزيكا دارىسىمەن، ءبىلىمىمدى بالالارعا بەرىپ كەلە جاتىرمىن»، – دەدى №178 مامانداندىرىلعان ليسەي ءمۇعالىمى، «ى. التىنسارين» توسبەلگىسىنىڭ يەگەرى گۇلنار سليامعالييەۆا.
№178 مامانداندىرىلعان ليسەيدىڭ پەداگوگيكالىق ۇجىمىندا 174 ءمۇعالىم، ونىڭ ىشىندە 1 ەكونوميكا عىلىمىنىڭ كانديداتى، «ى. التىنسارين» توسبەلگىسىن تاققان 3 ۇستاز بەن 4 ۇزدىك پەداگوگ جۇمىس ىستەيدى. ليسەي ديرەكتورىنىڭ سوزىنشە، ءبىلىم ىزدەگەن جاستاردىڭ دامۋى ۇستاز بىلىكتىلىگىمەن تىكەلەي بايلانىستى.
«وقۋشىلاردىڭ اراسىندا وتە جوعارى دەڭگەيدە ءبىلىم ساپاسىن كورسەتەتىن وقۋشىلارمىز جەتكىلىكتى. مىسالى، ءار جىلى 280، بىلتىرعى وقۋ جىلىندا 239 وقۋشى 11-سىنىپتى اياقتادى»، – دەدى №178 مامانداندىرىلعان ليسەي ديرەكتورى قايراتبەك شادييەۆ.
بيىل الماتىدا 30 مىڭنان استام ءبۇلدىرشىن مەكتەپ تابالدىرىعىن اتتادى. سونداي-اق الاتاۋ، ناۋرىزباي جانە تۇركسىب اۋداندارىندا 12600 ورىنعا ارنالعان 8 مەملەكەتتىك مەكتەپ سالىنىپ جاتىر. جوسپار بويىنشا 3 جاڭا مەكتەپ جىل سوڭىندا قولدانىسقا بەرىلمەك.