يننوۆاسيالىق ناۆيگاتور 150 مىڭ جۇمىس ورنىن اشادى دەپ جوسپارلانعان 755 ينۆەستيسيالىق جوباعا مونيتورينگ جۇرگىزۋدە
ەڭبەك مينيسترلىگى جۇمىسسىزدىق دەڭگەيىن قىسقارتۋ جانە قازاقستاندا جۇمىسقا ورنالاسۋ پروسەسىن جاقسارتۋ بويىنشا بەلسەندى جۇمىس ىستەۋدى جالعاستىرۋدا. 2024 جىلعى نەگىزگى قادامداردىڭ ءبىرى جۇمىسپەن قامتۋدى ءتيىمدى جوسپارلاۋعا جانە ەڭبەك نارىعىنىڭ قاجەتتىلىكتەرىن ەسكەرۋگە كومەكتەسەتىن ايماقتىق جۇمىسپەن قامتۋ كارتالارىن بەكىتۋ بولدى. 2024 جىلى 948 مىڭ قازاقستاندىقتى جۇمىسقا ورنالاستىرۋ جوسپارلانعان بولاتىن، ونىڭ ىشىندە جەلتوقسان ايىنىڭ باسىندا 845 مىڭنان استام ادام جۇمىسپەن قامتىلعانى ءمالىم بولدى، بۇل جىلدىق جوسپاردىڭ 89%-ىن قۇرادى.
بيىل 9،6 مىڭ جۇمىسسىز ازامات ءۇشىن قىسقا مەرزىمدى كۋرستار ۇيىمداستىرىلدى، skills.enbek.kz پلاتفورماسىندا 50 مىڭنان استام ادام ونلاين وقىتۋدان ءوتتى، بۇل ولاردىڭ بىلىكتىلىگىن جانە باسەكەگە قابىلەتتىلىگىن ارتتىردى.
بۇدان باسقا، جالاقىنى سۋبسيديالاۋ باعدارلامالارى بەلسەندى جۇزەگە اسىرىلۋدا. وعان قوعامدىق جۇمىستار، الەۋمەتتىك جۇمىس ورىندارى، جاستار تاجىريبەسى جانە «العاشقى جۇمىس ورنى»، «ۇرپاقتار كەلىسىمشارتى» جانە «كۇمىس جاس» جوبالارى كىرەدى. وسى باعدارلامالار اياسىندا 180 مىڭنان استام ادام سۋبسيديالاناتىن جۇمىس ورىندارىنا ورنالاستىرىلدى.
كاسىپكەرلىكتى قولداۋ جانە جاڭا جۇمىس ورىندارىن قۇرۋ ءۇشىن «باستاۋ بيزنەس» جوباسى جالعاستىرىلدى، ونىڭ شەڭبەرىندە كاسىپكەرلىككە وقىتۋدان وتكەن ازاماتتار وزدەرىنىڭ ميكروبيزنەسىن اشۋعا وتەۋسىز گرانتتار الا الادى. 2024 جىلى مۇنداي كومەككە 8،9 مىڭ ادام قول جەتكىزدى.
جاڭا جەتىستىكتەردىڭ ءبىرى – «Mansap Compasy» پلاتفورماسىن ەنگىزۋ. بۇل پلاتفورما ازاماتتارعا ماماندىق تاڭداۋعا، مانساپتى جوسپارلاۋعا جانە سۇرانىسقا يە ماماندىقتارعا نازار اۋدارۋعا كومەكتەسەدى. ول سونداي-اق مەكتەپ تۇلەكتەرى مەن ستۋدەنتتەرگە كاسىپتە ءوز جولىن تابۋعا كومەكتەسۋ ارقىلى جاستار اراسىنداعى جۇمىسسىزدىق دەڭگەيىن ازايتۋعا ىقپال ەتەدى.
ستۋدەنتتەر ءۇشىن ەلەكتروندى ەڭبەك بيرجاسىندا وندىرىستىك پراكتيكاعا ورىن تابۋعا كومەكتەسەتىن جاڭا فۋنكسيونال ەنگىزىلدى. بۇل جاستارعا پراكتيكالىق داعدىلاردى الۋعا جانە ەڭبەك نارىعىندا باسەكەگە قابىلەتتىلىگىن ارتتىرۋعا مۇمكىندىك بەرەدى.
بۇدان باسقا، جوبالاردىڭ يننوۆاسيالىق ناۆيگاتورى ازىرلەندى، وندا جوسپار بويىنشا 150 مىڭ جۇمىس ورنى اشىلاتىن 755 ينۆەستيسيالىق جوباعا مونيتورينگ جۇرگىزىلۋدە. بولاشاقتا وسى پلاتفورما ارقىلى مەملەكەتتىك باستامالار شەڭبەرىندە ىسكە اسىرىلاتىن بارلىق جوبالار قاداعالاناتىن بولادى.
سونداي-اق كەپىلدەندىرىلگەن تۇراقتى جۇمىسپەن قامتۋ، ءقاۋىپسىز ەڭبەك جاعدايلارى جانە مانساپتىق مۇمكىندىكتەر بار جۇمىس ورىندارىن باقىلايتىن «ساپالى جۇمىس ورىندارىن» مونيتورينگىلەۋ جۇيەسى قولدانىلادى. 2024 جىلى مۇنداي جۇمىس ورىندارىنىڭ سانىن 3 جىلدا 824 مىڭعا ارتتىرۋ جوسپارلانۋدا.
