2024 جىل قازاقستاندا الەۋمەتتىك قورعاۋ جۇيەسىن دامىتۋدىڭ ماڭىزدى كەزەڭى بولدى. نەگىزگى قادامداردىڭ ءبىرى بازالىق جانە ورتاق زەينەتاقىلاردى، سونداي-اق مەملەكەتتىك جاردەماقىلاردى يندەكستەۋمەن بايلانىستى الەۋمەتتىك تولەمدەردى ارتتىرۋ بولدى. ينفلياسيانىڭ بولجامدى دەڭگەيىن ەسكەرە وتىرىپ، تولەم مولشەرى ۇلعايتىلدى.
مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەنگى بازالىق زەينەتاقىنى ەڭ تومەنگى كۇنكورىس دەڭگەيىنىڭ 70%-نا دەيىن، ەڭ جوعارعىسى – 120%-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى. 2024 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى ەڭ تومەنگى كۇنكورىس دەڭگەيىنەن 60%-دان 65%-عا دەيىن ءوستى، بۇل 28 215 تەڭگەنى قۇرايدى، ەڭ جوعارى مولشەرى – ەڭ تومەنگى كۇنكورىس دەڭگەيىنەن 100%-دان 105%-عا دەيىن، بۇل 45 578 تەڭگەنى قۇرايدى.
2024 جىلعى 1 قاڭتاردان باستاپ جۇمىس بەرۋشىلەردىڭ مىندەتتى زەينەتاقى جارنالارىن كەزەڭ-كەزەڭىمەن ىسكە اسىرۋ باستالدى، ولار 4،3 ملن-نان استام جۇمىس ىستەيتىن ازاماتتاردىڭ شوتتارىنا اۋدارىلدى. بۇل شارا جاستاردىڭ بولاشاق زەينەتاقىسىنىڭ دەڭگەيىن ارتتىرۋعا باعىتتالعان.
2024 جىلى زياندى ەڭبەك جاعدايلارىندا ۇزاق ۋاقىت جۇمىس ىستەيتىن ازاماتتاردى الەۋمەتتىك قولداۋدى قامتاماسىز ەتۋگە ەرەكشە نازار اۋدارىلدى. جاڭا ارنايى الەۋمەتتىك تولەم ەنگىزىلىپ، ول 2024 جىلدىڭ 1 قاڭتارىنان باستاپ 13 مىڭ ادامعا تاعايىندالدى.
جالپى، 2024 جىلى رەسپۋبليكالىق بيۋدجەتتەن الەۋمەتتىك تولەمدەرگە 5،3 ترلن تەڭگە باعىتتالدى، بۇل ەلىمىزدىڭ بيۋدجەت شىعىستارىنىڭ جالپى كولەمىنىڭ 22%-ىن قۇرادى. اتالعان قاراجات 4،5 ملن ازاماتتى قولداۋعا باعىتتالعان.
