قازاقستان اۋماعىن جاياۋ باعىندىرۋعا بەل بۋعان مارافونشى مەككەگە جاياۋ بارۋدى ارماندايدى.
72 جاستاعى مارافونشى سارسەنباي قوتىراشوۆ ەلورداعا جەتتى. ەلىمىزدىڭ باس قالاسى – مارافون كەزىندە قاريا ايالداعان 13ء-شى ءوڭىر. اقساقال تۋعان جەرى قاراعاندى وبلىسىنداعى ۇلىتاۋ اۋىلىنان جولعا شىققان، دەپ حابارلايدى Almaty-akshamy.kz.
ءقازىر كۇنىنە 40 شاقىرىمدى ارتتا تاستايدى. الىس ساپارعا شىقپاستان بۇرىن زەينەتكەر مارافونعا تۇپكىلىكتى دايىندالعان. ول كۇن سايىن 100 شاقىرىمعا دەيىن ءجۇرىپ وتكەن.
«الداعى ماقسات - مەككەگە جاياۋ بارسام دەگەن ارمانىم بار. ودان كەيىن اللا قۋات بەرسە جەر شارىن ارالاپ شىعىپ، حالقىمنىڭ بار ەكەنىن، ۇلتىمنىڭ بار ەكەنىن دۇنيەگە تانىتسام دەيمىن»، - دەيدى ساياحاتشى سارسەنباي قوتىراشوۆ.
وسى ۋاقىت ىشىندە جيھانكەز ون جۇپ اياق كيىمدى توزدىرىپ ۇلگەرگەن. جالپى، قاراشا ايىنا دەيىن مارافونشى قازاقستاننىڭ 18 قالاسىن جاياۋ ارالاۋدى كوزدەپ وتىر. جۇرگەن جەرىندە ۇلىتاۋ تاريحىن تانىستىرا وتىرىپ، ناۋرىز مەرەكەسىن كەڭىنەن ناسيحاتتاۋدى، سونداي-اق ءار وڭىردەگى قولونەر شەبەرلەرى تۋرالى تىڭ دەرەكتەردى دە جيناقتاۋدى ماقسات ەتكەن.