قازاقستاندا پەداگوگتەردىڭ قول جەتكىزگەن جەتىستىكتەرىن جوعارى باعالاۋ ءداستۇرلى شاراعا اينالدى.
2012 جىلدان باستاپ «ۇزدىك پەداگوگ» رەسپۋبليكالىق بايقاۋىنىڭ اياسىندا ەلىمىزدىڭ تۇكپىر-تۇكپىرىنەن كاسىبي قىزمەتىندە جوعارى كورسەتكىشتەرگە جەتكەن ۇستازدار مەملەكەت تاراپىنان ماراپاتتالىپ كەلەدى، دەپ حابارلايدى aqshamnews.kz.
وقۋ-اعارتۋ مينيسترلىگىنىڭ مالىمەتىنشە، 12 جىل ىشىندە 700-گە جۋىق قازاقستاندىق پەداگوگ جەڭىمپاز اتاندى.
كونكۋرس پەداگوگتەردىڭ شىعارماشىلىق جانە كاسىبي الەۋەتىن دامىتۋعا ىنتالاندىرۋعا باعىتتالعان. ونىڭ ىشىندە ۇستاز پەداگوگيكالىق قاۋىمداستىقتا تابىستى سىناقتان وتكەن ادىستەمەلەرى، سونداي-اق وقۋشىلارىنىڭ جەتىستىكتەرى ارقىلى باعالانادى. ءداستۇرلى تۇردە جەڭىمپازدارعا «ۇزدىك پەداگوگ» توسبەلگىسى جانە 1000 اەك مولشەرىندە اقشالاي سىياقى بەرىلەدى.
ماسەلەن، 2023 جىلى 64 ۇزدىك ۇستازعا جالپى سوماسى 220 ملن 800 مىڭ تەڭگە كولەمىندە سىياقى تولەندى. «ۇزدىك پەداگوگ» اتاعىن يەلەنۋشىنىڭ ءارقايسىسىنا قازاقستان رەسپۋبليكاسى ءبىلىم جانە عىلىم ءمينيسترىنىڭ 2015 جىلعى 16 قاڭتارداعى № 12 بۇيرىعىنا سايكەس 3 ملن 450 مىڭ تەڭگە كولەمىندە سىياقى بەرىلدى.
بايقاۋدى وتكىزۋ ءراسىمى اۆتوماتتاندىلىرعان جانە جاريالى تۇردە وتەدى. رەسپۋبليكالىق بايقاۋ كوميسسياسىنىڭ قۇرامىنا ۇكىمەتتىك ەمەس ۇيىمداردىڭ، اتا-انالار قاۋىمداستىعىنىڭ وكىلدەرى، جۋرناليستەر، پەداگوگتەر جانە قازاقستاندىق سالالىق ءبىلىم جانە عىلىم قىزمەتكەرلەرىنىڭ كاسىپتىك وداعىنىڭ وكىلدەرى ەنەدى.
بيىلىعى جىلى «ۇزدىك پەداگوگ» رەسپۋبليكالىق بايقاۋىنىڭ اۋداندىق جانە وبلىستىق كەزەڭدەرى 8 تامىز-10 قىركۇيەك ارالىعىندا جەرگىلىكتى جەرلەردە ۇيىمداستىرىلدى. العاشقى ەكى كەزەڭنىڭ ناتيجەسى بويىنشا جوعارى بالل جيناعان پەداگوگتەر رەسپۋبليكالىق كەزەڭگە جولداما الادى. قاتىسۋ ءۇشىن ءوتىنىم 5 قازانعا دەيىن قابىلدانادى. بۇگىنگى تاڭدا 180-نەن استام مەكتەپكە دەيىنگى، ورتا، تەحنيكالىق جانە كاسىپتىك ۇيىمدار پەداگوگى ءوتىنىم بەرىپ ۇلگەردى.