ءمارياش دابىلحانوۆا 59 جاسىندا جۇك كولىگىن جۇرگىزۋدى ۇيرەنگەن، ءقازىر ول جۇك كولىگىمەن اقش-تى ارالاپ ءجۇر. وتانداسىمىز ءومىرىن قالاي تۇبەگەيلى وزگەرتكەنىن جانە وزگەرىستەردەن قورىقپاۋ جولدارىن ايتىپ بەردى، - دەپ حابارلايدى اlmaty-akshamy.kz Massaget.kz-كە سىلتەمە جاساپ.
ءمارياش دابىلحانوۆا اقتوبە وبلىسى، لەنين اۋدانى، ستەپنوە اۋىلىندا دۇنيەگە كەلگەن. ول مەكتەپتى مارتوك اۋدانىندا ءتامامداپ، كەيىن جايساڭ اۋىلىنداعى كاسىپتىك-تەحنيكالىق ۋچيليششەدە تراكتورشى ماماندىعى بويىنشا ءبىلىم العان.
«ءۇش جىل سوۆحوزدا ەگىن ەگىپ، شابۋ، تەحنيكا جوندەۋ جۇمىستارىمەن اينالىستىم. مەن ول كەزدە 17-18 جاستا ەدىم، ءارى قاراي وقۋ كەرەگىن ءتۇسىندىم. اۋىلشارۋاشىلىق تەحنيكۋمىنا ءتۇسىپ، اگرونوم ماماندىعىن الدىم»، - دەپ ەسكە الادى ءمارياش دابىلحانوۆا.
ءمارياش 1983 جىلى كۇيەۋگە شىققان، ءقازىر ءتورت بالاسى بار. 90-جىلدارى وتباسى اقتوبەگە كوشىپ كەلگەن. مۇندا ايەل قايتادان جاڭا ماماندىقتى يگەرۋگە ءماجبۇر بولعان. 5 جىل پوشتا بولىمشەسىندە، كەيىن اراق-شاراپ زاۋىتىندا جۇمىس ىستەگەن. 2014 جىلى ءمارياش كۇيەۋىمەن اقش-قا قىزىنا قوناققا بارعان. ونىڭ ايتۋىنشا، سول كەزدە العاش رەت ۇشاقپەن ۇشىپ، العاش رەت شەتەلدە بولعان.
«مەن اقش-قا بارۋدى ارمانداعان جوقپىن، بۇل تۋرالى ويلاعان دا ەمەسپىن. امەريكاعا قول جەتپەيتىندەي كورىندى. تۋىستارىمىز ءبىزدى قولداپ، قۋانتتى. ءبىز قىزىمىزبەن ۆيردجينيادا تۇردىق. ۇمىتىلماستاي بولدى، جاي عانا مادەني شوك الدىم: اينالاداعى ادامدار سىپايى جانە مەيىرىمدى، كوشەلەر تازا، مەيرامحانالارى ۇلكەن»، - دەدى ول.
ءمارياش دابىلحانوۆا جۇك كولىگىن ايداۋدى قالاي ۇيرەنىپ العانىن ايتتى.
«مەن ءومىر بويى اقتوبەدە تۇردىم، ءوز قالامدى جاقسى كورەمىن. ءبىراق اقش-تان سوڭ ءومىرىم 180 گرادۋسقا وزگەردى. مۇندا دا كوپ ەڭبەك ەتتىم. YouTube ارقىلى ورىس ءتىلدى جۇك كولىگىن جۇرگىزۋشىلەردى كورىپ، ولاردىڭ جۇمىسىنان شابىت الدىم. 59 جاسىمدا جۇك كولىگىن جۇرگىزۋشىلەر مەكتەبىنە (جۇك جۇرگىزۋشىلەرى - ەسك.) وقۋعا ءتۇستىم، ەكى اي وقىدىم. تەوريادان ءوتىپ، اعىلشىن تىلىندە 650 سۇراققا دايىندالىپ، ەمتيحاندى ءساتتى تاپسىردىم. ال پراكتيكالىق جۇرگىزۋ كىشىگىرىم جولدار مەن فەدەرالدىق ماڭىزى بار تاسجولداردا ءوتتى. ءقازىر مەن 2019 جىلعى Volvo VNL 860 جۇك كولىگىن جۇرگىزەمىن. جۇك كولىگى بارلىق قاجەت زاتتارمەن جابدىقتالعان، ميكروتولقىندى پەش، توڭازىتقىش، شاينەك بار. مەن وعان ءۇي تاعامدارىن جاسايمىن، قارا شاي ىشەمىن. ال ۇيدەگى تاعامنان جالىققان كەزدە، جۇك كولىگى ايالدامالارىندا كەز كەلگەن ءدامحاناعا بارامىن»، - دەدى ول.
ءبىىر قىزىعى بۇعان دەيىن ءمارياش ەشقاشان كولىك جۇرگىزبەگەن.
«ءتىلىن تۇسىنبەسەم دە، ادامدار تۇسىنەدى، كومەكتەسەدى، مەن ەشقاشان جاسىما دا، ەلىمە بايلانىستى دا كەمسىتكەندى سەزبەدىم. ادامدار، كەرىسىنشە، ءسۇيسىنىپ، قۋانادى. مۇندا جۇك كولىگىن جۇرگىزەتىن ايەلدەر جەتكىلىكتى. ەر ادامدار رەنجىتپەيدى. دوڭگەلەكتى اۋىستىرۋعا قۇقىعىمىز جوق، مۇندا تىيىم سالىنعان. جىلجىمالى جوندەۋ بريگاداسى كەلىپ، جوندەۋ جۇمىستارىن جۇرگىزەدى. مەن جۇك كولىگىنىڭ ۇساق-تۇيەگىن جوندەي الامىن، مىسالى، ماي اۋىستىرا الامىن»، - دەيدى ءمارياش دابىلحانوۆا.
ءمارياش دابىلحانوۆا اقش-تىڭ بارلىق شتاتىندا بولعان. وعان نيۋ-يوركتەگى ورتالىق ساياباق، بوستاندىق ءمۇسىنى قاتتى ۇنايدى. كەيىپكەرىمىز ءار شتاتتىڭ وزىندىك ەرەكشەلىگى بار ەكەنىن ايتتى. ونىڭ ايتۋىنشا، تەحاس وتە ۇلكەن شتات، ۆيردجينيانىڭ تابيعاتى اسەم، اريزونانىڭ قۇرعاق اۋاسى قازاقستاندى ەسكە تۇسىرەدى. ءمارياش جولدا ءۇش اپتاعا جۋىق ۋاقىت وتكىزەدى، ال ءبىر اپتا دەمالادى. ءقازىر جەرلەسىمىزدىڭ ءتورت بالاسى، 9 نەمەرەسى بار.