بيىل اۋىز سۋ تاپشىلىعىنا بايلانىستى حالىقتان تەك رەسمي تۇردە 9 مىڭنان اسا شاعىم تۇسكەن.
ال قانشاسى رەسمي تۇردە ايتىلماي قالىپ جاتىر. قۇبىرلاردىڭ ءجيى جارىلۋىنان تۇرعىندار ايلار بويى سۋسىز قالۋدا. پرەمەر-مينيستر ءاليحان سمايىلوۆ ۇكىمەتتەگى كەزەكتى جيىندا اتالعان ماسەلەنى كوتەردى، دەپ حابارلايدى Almaty-akshamy.kz.
ول كەلەسى جىلى سۋ بەرۋ جوسپارلانىپ وتىرعان 115 ەلدى مەكەن بويىنشا جوبالاۋ قۇجاتتارىن بيىل پىسىقتاۋدى مىندەتتەدى. سونداي-اق ەلدەگى 20 قالانى سۋمەن جابدىقتاۋ جانە سۋ بۇرۋدىڭ وندىرىستىك پروسەستەرىن اۆتوماتتاندىرۋ بويىنشا جوبالاۋ قۇجاتتارىن دايىنداۋ جۇمىستارىن اياقتاۋدى تاپسىردى.
«قازىرگى تاڭدا 600 مىڭنان استام ازاماتىمىز اۋىز سۋعا مۇقتاج. بۇل - اسا اۋقىمدى جانە ماڭىزدى جۇمىس. الايدا وعان بارلىعى بىردەي جاۋاپكەرشىلىكپەن قاراپ وتىرعان جوق. سوندىقتان سۋ ماسەلەسىنىڭ ۇلكەن الەۋمەتتىك ماڭىزدىلىعىن ەسكەرە وتىرىپ، ءاربىر ءوڭىر، اسىرەسە، ەڭ تومەنگى كورسەتكىشتەرى بار وبلىستار جۇمىستى جانداندىرۋى كەرەك»، - دەيدى ق ر پرەمەر-مينيسترى ءاليحان سمايىلوۆ.