كۇنى كەشە قازاقستان رەسپۋبليكاسى ۇلتتىق ۇلانىنىڭ 5571 اسكەري بولىمىندە ماڭىزدى ءارى سالتاناتتى شارا ءوتتى. اسكەري ءبولىم قاتارىنا جاڭادان قوسىلعان 600-دەن استام جاس سارباز وتان الدىنداعى باستى بورىشىنىڭ بەلگىسى – اسكەري انت قابىلدادى.
سالتاناتتى راسىمگە اسكەري ءبولىمنىڭ ارداگەرلەرى، الماتى قالاسى مەن الماتى وبلىسى بويىنشا «انالار جۇرەگى» ساربازدار انالارى كوميتەتىنىڭ وكىلى تاتيانا تروپينا، الماتىلىق جەدەل قۇرامانىڭ باسشىلىعى، سونداي-اق ساربازداردىڭ اتا-انالارى مەن جاقىن تۋىستارى قاتىستى. ءىس-شارا اشىق دەپ جاريالانعاننان كەيىن قازاقستان رەسپۋبليكاسىنىڭ مەملەكەتتىك گيمنى شىرقالىپ، ەلىمىزدىڭ كوك بايراعى سالتاناتتى تۇردە كوتەرىلدى. مەملەكەتتىك تۋدى كوتەرۋ قۇرمەتى وقۋ پۋنكتىنىڭ ۇزدىك ساربازى، قاتارداعى ەرمەك مۇساحانوۆقا بەرىلدى.
سالتاناتتى جيىندا ءسوز سويلەگەن 5571 اسكەري ءبولىمىنىڭ كومانديرى، پولكوۆنيك ماقسات بايماعۇلوۆ جاس ساربازداردى ماڭىزدى تاريحي ساتپەن قۇتتىقتاپ، ولاردىڭ الداعى قىزمەتىنە ساتتىلىك تىلەدى: – بۇگىن اسكەري بولىمدە ەرەكشە ءارى ماڭىزدى وقيعا بولىپ وتىر. جاس ساربازداردىڭ اسكەري انت قابىلداۋى – ءبىز ءۇشىن مارتەبەلى كۇندەردىڭ ءبىرى. وسى ءسات ومىرلەرىڭىزدە ماڭگى ەستە ساقتالاتىنىنا سەنىمدىمىن. بۇگىننەن باستاپ سىزدەر قازاقستان رەسپۋبليكاسى ۇلتتىق ۇلانىنىڭ ساربازدارى قاتارىنا رەسمي تۇردە قوسىلدىڭىزدار. ەندى ەل تىنىشتىعىن سەنىمدى قورعاپ، اسكەري بورىشتارىڭىزدى ادال اتقارىڭىزدار. ۇلتتىق ۇلاننىڭ اتىن، ونىڭ باي اسكەري ءداستۇرىن ابىرويمەن جالعاستىرۋ – سىزدەردىڭ باستى مىندەتتەرىڭىز، – دەدى بريگادا كومانديرى.
سونداي-اق مىنبەردە 2-وقۋ روتاسىنىڭ ساربازى قاتارداعى الىبەك اقمولدايەۆتىڭ اناسى جاننا ناعىزبەك قىزى، ءبولىم ارداگەرلەر كەڭەسىنىڭ ءتوراعاسى، زاپاستاعى مايور بەرىك الماعامبەتوۆ جانە «انالار جۇرەگى» ساربازدار انالارى كوميتەتىنىڭ وكىلى تاتيانا تروپينا ءسوز سويلەپ، جاس جاۋىنگەرلەرگە اق تىلەكتەرىن ارنادى. ولار اسكەري قىزمەتشىلەرگە العىستارىن ءبىلدىرىپ، ساربازداردىڭ ەل قورعانى بولۋ جولىنداعى جاۋاپتى قىزمەتىنە سەنىم ءبىلدىردى.
سونىمەن قاتار 1-وقۋ روتاسىنىڭ ساربازى قاتارداعى ءالينۇر ءاشىرحان دا ءسوز الىپ، قارۋلاستارىنا جىگەر بەرىپ، وتانعا ادال قىزمەت ەتۋگە شاقىردى. وسىلايشا، جاس جاۋىنگەر كۋرسىنان وتكەن جانە اسكەري انت قابىلداعان ساربازدار بۇگىننەن باستاپ ەلىمىزدىڭ زاڭدىلىعى مەن قوعامدىق قاۋىپسىزدىگىن قامتاماسىز ەتەتىن ۇلتتىق ۇلان اسكەري قىزمەتشىلەرىمەن ءبىر ساپتا قىزمەت ەتەتىن بولادى.
ەستەرىڭىزگە سالا كەتەيىك، 5571 اسكەري ءبولىمىنىڭ جەكە قۇرامى وڭتۇستىك استانانىڭ قوعامدىق-ساياسي، سپورتتىق، مادەني ءىس-شارالارىنا، سونداي-اق مەگاپوليستەگى قوعامدىق ءتارتىپتى ساقتاۋعا بەلسەندى قاتىسادى. انت بەرگەن ساربازدار جاقىن ارادا الماتى كوشەلەرىندە قۇقىقتىق ءتارتىپتى قامتاماسىز ەتۋ جونىندەگى مىندەتتەردى ورىنداۋعا كىرىسەدى.