قاراساي اۋدانىنا قاراستى بايتوبە اۋىلىنىڭ تۇرعىندارى اۋىل ماڭىنا جاڭا ۇلكەن اينالما جولى تۇسكەلى ابىگەرگە تۇسكەن. 6 جولاقتى رەسپۋبليكالىق تاسجولدا اۋىلعا كىرەتىن جولايرىق سالىنباعان، دەپ حابارلايدى اlmaty-akshamy.kz Almaty.tv-گە سىلتەمە جاساپ.
الماتى وبلىسىنداعى 500 وتباسى اۋىلدان شىعا الماي قالعان. ولاردىڭ ايتۋىنشا، ۇلكەن تاسجول ەلدى مەكەندى قاق ءبولىپ ءوتىپ، بايتوبەگە كىرەتىن جول قالدىرماعان. كەسىرىنەن تۇرعىندار باسپاناسىنا تاۋ اسىپ، باتپاق كەشىپ جەتىپ ءجۇر.
«بالالارىمىز 3 مەزگىل مەكتەپكە بارادى. "باكاد جابىلادى" دەپ ءبىز ارالدا قالدىق. ۋچاسكەنى ساتقان كەزدە، باكاد تۇسەدى دەگەن سوڭ، حالىق قۋانىپ العان. اكىمدىككە ايتساق، ولار بىلمەيتىنىن ايتتى. ولار جەر ساتىلعان كەزدە قالاي بىلمەگەن؟! قۇجاتىمىز بار»، - دەدى اۋىل تۇرعىنى بۇركىت بايداۋلەتوۆ.
«كەلەشەگىمىز بالالارىمىز عوي. وسىلار قينالماي مەكتەبىنە، بالاباقشاعا بارىپ كەلگەنىن قالايمىز. ۋادە بەرەدى. ءبىراق تۇك تە جوق»، - دەدى اۋىل تۇرعىنى ماليكا يمانقۇلوۆا.
ال سالا ماماندارىنىڭ ايتۋىنشا، 16 ەلدى مەكەندى باسىپ وتەتىن ۇلكەن الماتى جولىندا تەك 10 شاقىرىمدىق اراقاشىقتىقتا جولايرىق جاسالۋعا ءتيىس. سايكەسىنشە، ۇلكەندى-كىشىلى تەحنيكاعا توسقاۋىل بولاتىنداي ءقاۋىپ بولماۋى كەرەگىن ايتادى. ياعني بۇرىلىستى كەز كەلگەن جەرگە قويۋعا بولمايدى.
«قالا قۇرىلىسىن رەتتەۋگە سايكەس، جەرگىلىكتى اتقارۋشى ورگاندار ەلدىمەكەندەرگە شەگىندە جول جيەگىن سالۋعا ءتيىس قارجىنى ءبولۋ ارقىلى بەكىتىلگەن جوباسىن ىسكە اسىرۋى قاجەت. كەمەرتوعانعا قاراستى بايتوبە اۋىلىنا كەلەتىن بولساق، بۇل رەتتە نورموتيۆ قۇجاتتارعا سايكەس، 1 ا تەحنيكالىق اۆتوموبيلدەر ساناتىنداعى جولدارمەن ءبىر دەڭگەيدە قابىسۋعا جول بەرىلمەيدى»، - دەدى ق ر يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ باسقارما جەتەكشىسى جاندوس يگەمبايەۆ.
بايتوبەلىكتەر قالاعا قاتىناۋ قيىنداي تۇسكەنىنە نارازى. جۇرتشىلىق ۇلكەن اينالما جولى تولىق قولدانىسقا بەرىلسە، قازىرگى قارا جولدان دا قۇر قالامىز دەيدى.
«ءبىزدىڭ مەكتەبىمىز مىناۋ كەمەرتوعاندا تۇر. ەگەر اينالىپ بارساق، 15 شاقىرىم اسىپ كەتەدى. كەپتەلىس تاعى بار. ءبىز ءارى قىسقا، ءارى ىڭعايلى جول جاساپ بەرۋىن سۇرايمىز»، - دەدى اۋىل تۇرعىنى ەرمەك تۇرداقىنوۆ.
ازىرگە بايتوبەلىكتەرگە اۋىلعا كىرەتىن قوسىمشا جول قۇرىلىسىنىڭ اياقتالۋىن كۇتۋدەن باسقا امال جوق.
«ءبىز دەرەۋ شەشىم قابىلداپ، اۋىلعا كىرەتىن قوسىمشا جولدى قاراستىرىپ بەردىك. ءقازىر ول جولايرىق 70 پايىز اياقتالىپ قالدى. بۇل جول قۇرىلىسىن بيىل ساۋىردە وتكىزۋدى جوسپارلاپ وتىر. ول اياقتالسا، اۋىلعا كىرىپ-شىعۋ قيىندىق تۋدىرمايدى»، - دەدى قاراساي اۋدانى اكىمنىڭ ورىنباسارى مارلەن قاسەنوۆ.