بۇل تۋرالى ۇقك باسپا ءسوز قىزمەتى حابارلادى
رەسەيدەن 205 قوراپ تەمەكىنى زاڭسىز اكەلە جاتقان شەتەل ازاماتى ۇستالدى، دەپ حابارلايدى Almaty-akshamy.kz ۇلتتىق قاۋىپسىزدىك كوميتەتىنە سىلتەمە جاساپ.
17 مامىردا «قايراق» اۆتوكولىك وتكىزۋ پۋنكتىندە شەكارا قىزمەتى قوستاناي وبلىسى بويىنشا دەپارتامەنتىنىڭ اسكەري قىزمەتكەرلەرى شەتەل ازاماتى تىزگىندەگەن جۇك كولىگىن توقتاتقان.
ونى تەكسەرۋ بارىسىندا اكسيزدىك ماركىلەرى مەن ىلەسپە قۇجاتى جوق 205 قوراپتاعى تەمەكىنى انىقتادى.
تاركىلەنگەن تاۋاردىڭ قۇنى الدىن الا ەسەپ بويىنشا 50 ملن تەڭگەدەن اسادى.
زاڭ بۇزۋشى مەن انىقتالعان جۇك ايماقتىق ەكونوميكالىق تەرگەۋ دەپارتامەنتى قىزمەتكەرلەرىنە تاپسىرىلدى.