وزگە ۇلتتىق قۇرامالار سياقتى قازاق كۇرەسىنىڭ بالۋاندارى دا كوشپەندىلەر ويىندارىنا قىزۋ دايىندىق ۇستىندە.
جىل باسىنان بەرى ۇلتتىق قۇراما سپورتشىلارىنىڭ قاتىسۋىمەن 4 وقۋ-جاتتىعۋ جيىنى ءوتتى. اتاپ ايتقاندا، بالۋاندار بۇعان دەيىن الماتى قالاسىندا ەكى مارتە، گرۋزيا ەلىندە جانە قىرعىزستاندا دايىندىقتارىن جۇرگىزدى، دەپ حابارلايدى aqshamnews.kz .
قازىرگى ۋاقىتتا كەزەكتى وقۋ-جاتتىعۋ جيىنى 1-14 تامىز ارالىعىندا اقمولا وبلىسىنىڭ ششۋچە قالاسىندا وتۋدە. بۇل وقۋ-جاتتىعۋ جيىنى بارىسىندا بالۋانداردىڭ اراسىندا قورىتىندى بەلدەسۋلەر وتكىزىلىپ، ءار سالماقتىڭ ۇزدىكتەرى انىقتالدى.
ءسويتىپ، 5ء-شى دۇنيەجۇزىلىك كوشپەندىلەر ويىندارىنا كەلەسى بالۋاندار ىرىكتەلدى:
ەرلەر – تولەپوۆ بەكجان (55 كگ، جەتىسۋ وبل.)، بەرەكەتوۆ مەيىرجان (60 كگ، سقو)، تۇقىشيەۆ ديدار (66 كگ، اباي وبل.)، قوجامبەكوۆ جۇماجان (74 كگ، شىمكەنت ق.)، سەيىتقازىنوۆ ەرسىن (82 كگ، اباي وبل.)، جاناتايەۆ ەراسىل (90 كگ، الماتى ق.)، مۇزاپپاروۆ ەرسۇلتان (100 كگ، شىمكەنت ق.)، جارىلعاپوۆ نۇرداۋلەت (+100 كگ، ماڭعىستاۋ وبل.).
ايەلدەر – جىلقىبايەۆا ايجان (48 كگ، تۇركىستان وبل.)، ازاماتوۆا نازەركە (52 كگ، اقتوبە وبل.)، نۇرماحاممەتوۆا راۋزا (56 كگ، جامبىل وبل.)، قۇساقبايەۆا باقىت (60 كگ، اقتوبە وبل.)، ساريپوۆا زارينا (65 كگ، اباي وبل.)، نىسانتاي قىزى روزا (70 كگ، اباي وبل.)، فايزوللانوۆا زامزاگۇل (77 كگ، شىمكەنت ق.)، باحييەۆا البينا (+77 كگ، شىمكەنت ق.).
قازاق كۇرەسىنەن ق ر ۇلتتىق قۇراماسىنىڭ باس باپكەرى عاني كەلدىقۇلوۆتىڭ ايتۋىنشا، كەشەندى ويىندارى الدىنداعى سوڭعى وقۋ-جاتتىعۋ جيىنى 27 تامىز بەن 7 قىركۇيەك ارالىعىندا استانا قالاسىنداعى جاقسىلىق ۇشكەمپىروۆ اتىنداعى جەكپە-جەك سارايىندا وتەدى.
– قازاق كۇرەسىنەن ق ر ۇلتتىق قۇراماسى كەشەندى ويىندارعا دايىندىق اياسىندا بەسىنشى وقۋ-جاتتىعۋ جيىنىن وتكىزىپ جاتىر. جالپى سپورتشىلارىمىز ورتا تاۋ بوكتەرىندە جالپى دەنە دايىندىقتارىن وتكىزىپ، شەتەلدىك بالۋاندارمەن تاجىريبە الماسقان بولاتىن. سپورتشىلار الداعى ماڭىزدى جارىسقا فيزيكالىق تۇرعىدان دا، تاجىريبە جاعىنان دا تولىقتاي دايىن دەپ ويلايمىن. ال سوڭعى وقۋ-جاتتىعۋ جيىنىندا سالماق قۋۋ جانە قالىپقا كەلۋ جۇمىستارىنا باسىمدىق بەرىلەتىن بولادى. وسىنداي ءىرى جارىستىڭ ءبىزدىڭ بالۋاندارىمىزعا ۇلكەن جاۋاپكەرشىلىك جۇكتەيدى. 5ء-شى دۇنيەجۇزىلىك كوشپەندىلەر ويىندارىندا سپورتشىلارىمىزدىڭ ەل نامىسىن ابىرويمەن قورعاپ، جۇلدەگەرلەردىڭ قاتارىنان كورىنۋ ءۇشىن بارىن سالاتىنىنا سەنىمدىمىن، – دەيدى عاني قۇدايبەرگەن ۇلى.
باس باپكەردىڭ سوزىنە قاراعاندا 5ء-شى دۇنيەجۇزىلىك كوشپەندىلەر ويىندارىندا ىرىكتەلىپ، 16 سالماق دارەجەسىندە ەل نامىسىن قورعايتىن بالۋانداردىڭ 50 پايىزدان استامى جەڭىستىڭ ءبىرىنشى ساتىسىنان كورۋى ابدەن مۇمكىن. ايتا كەتسەك، جىلدىڭ ەڭ ماڭىزدى ءارى اۋقىمدى الەمدىك سپورتتىق شاراسىنا 89 ەلدەن 2000-نان استام سپورتشى قاتىسادى. استاناداعى جارىستىڭ باعدارلاماسىنا 21 سپورت ءتۇرى كىرسە، ونىڭ 12 ۇلتتىق سپورتىمىز.