5 قازاندا قۇرمانعازى اتىنداعى قازاق ۇلتتىق وركەسترى 90-شى كونسەرتتىك ماۋسىمىن اشادى.
وركەستر تىڭداۋشىلارى مەن مۋزىكا اۋەسقويلارىن قانداي مۋزىكالىق جاڭالىقتار كۇتىپ تۇرعانىن وركەستر ۇجىمى وكق بريفينگىندە ايتتى، دەپ حابارلايدى Almaty-akshamy.kz.
90-شى مەرەيتويلىق ماۋسىم وتە قارقىندى بولۋعا ۋادە بەرەدى. اعىمداعى كونسەرتتىك ماۋسىم يتالياداعى گاسترولدىك تۋر بارىسىندا اشىلدى. وركەستردىڭ كونسەرتتىك تۋرلارى رەسپۋبليكا قالالارى بويىنشا دا جالعاسۋدا، دەپ ەسكە الدى قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشيەۆ.
«5 قازاندا 90-شى ماۋسىمنىڭ اشىلۋى باستالادى. كەلەسى جىلى وركەستر قۇرىلعانىنا 90 جىل تولادى، ونى ءبارىمىز اسىعا كۇتىپ ءجۇرمىز. مەرەيتويعا بايلانىستى رەسپۋبليكانىڭ بارلىق قالالارىندا جانە ودان تىس جەرلەردە گاسترولدىك تۋرلار جوسپارلانۋدا. اتاۋلى كۇننىڭ قۇرمەتىنە ءبىزدىڭ تىڭداۋشىلارىمىزدىڭ الدىندا قازاقستان رەسپۋبليكاسىنىڭ حالىق ءارتىسى نۇرجامال ۇسەنبايەۆا مەن قازاقستان رەسپۋبليكاسىنىڭ ەڭبەك سىڭىرگەن ءارتىسى نۇرلان ونەربايەۆ ونەر كورسەتەدى. ءبىزدىڭ وركەستر ۇجىمىمەن قاتار اباي اتىنداعى قازاق مەملەكەتتىك اكادەميالىق وپەرا جانە بالەت تەاترىنىڭ جانە فيلارمونيا ارتىستەرى دە ونەر كورسەتەدى»، - دەپ ءبولىستى م. قۋانىشيەۆ.
جاڭا ماۋسىمدا تىڭداۋشىلاردى جاڭا مۋزىكالىق شىعارمالار كۇتەدى. وركەستر وتاندىق جانە شەتەلدىك كومپوزيتورلاردىڭ ۇزدىك شىعارمالارىن ورىندايدى.
«ءبىز كورەرمەنگە جاڭا رەپەرتۋار ۇسىنۋعا تىرىسامىز. بۇل شەتەلدىك جانە وتاندىق كومپوزيتورلاردىڭ شىعارمالارى بولماق. وسى ماۋسىمدا ءبىز كومپوزيتور زەكينيا دە ابرەۋدىڭ ايگىلى «تيكو-تيكو» شىعارماسىن ورىنداماقپىز. شوستاكوۆيچتىڭ 10-شى سيمفونياسىنىڭ ەكىنشى ءبولىمى دە ءبىرىنشى رەت ورىندالادى. ال قالعانى تىڭداۋشىلارىمىز ءۇشىن توسىن سىي بولسىن»، - دەدى ۇلتتىق وركەستردىڭ باس ديريجەرى ابىلاي تىلەپبەرگەن.
ءوز كەزەگىندە، قوبىز توبىنىڭ كونسەرتمەيستەرى، حالىقارالىق بايقاۋلاردىڭ لاۋرەاتى اسەل راحىمجان ەموسيالارىن جاسىرمادى، باستى وقيعا - ۇلتتىق وركەستردىڭ 90 جىلدىق مەرەيتويى الدىندا قاتتى تولقىپ جۇرگەنىن ايتتى.
«ءبىز 90 جىلدىقتى اسىعا كۇتەمىز، ويتكەنى ۇلكەن وقيعانىڭ ءبىر بولىگى بولۋ ءبىز ءۇشىن ۇلكەن مارتەبە. ءبىزدىڭ وركەستردە احمەت جۇبانوۆ، شامگون قاجىعالييەۆ،قارشىعا احمەدياروۆ، فاتيما بالعايەۆا جانە باسقا دا كوپتەگەن ۇلى مۋزىكانتتار جۇمىس ىستەدى»، - دەپ ءبولىستى ا.راحىمجان.