الماتى قالاسىنىڭ اكىمى ەربولات دوسايەۆ الداعى قىسقى جىلىتۋ ماۋسىمىنا دايىندىق بويىنشا شتابتىڭ كەزەكتى كەڭەسىن وتكىزدى.
قالا باسشىسىنا ەنەرگەتيكا جانە سۋمەن جابدىقتاۋ باسقارماسىنىڭ، «الماتى جىلۋ جەلىلەرى» ج ش س، «الماتىجىلۋكوممۋنەنەرگو» ج ش س، «الماتى سۋ» مكك، «الماتى ەلەكتر ستانسيالارى» اق، «الاتاۋ جارىق كومپانياسى» اق «قازترانسگازايماق» اق جانە ت. ب. باسشىلارى جوندەۋ جانە دايىندىق جۇمىستارىنىڭ ارالىق قورىتىندىلارى تۋرالى باياندادى، دەپ حابارلايدى Almaty-akshamy.kz.
كەڭەس بارىسىندا بەيىندى ۆەدومستۆولار اتاپ وتكەندەي، الماتىنىڭ جىلۋ ەنەرگەتيكالىق كەشەنى مەن ينجەنەرلىك جەلىلەرىنىڭ قىس مەزگىلىنە جالپى دايىندىعى بۇگىندە 95%-دى قۇرايدى. بارلىق جۇمىستار كەستە بويىنشا جۇرۋدە.
جوسپارعا سايكەس، الماتىداعى قالا شارۋاشىلىعىنىڭ الداعى كۇزگى-قىسقى كەزەڭگە تولىق دايىندىعى اعىمداعى جىلدىڭ 1 قازانىنا دەيىن قامتاماسىز ەتىلەدى.
وسى جىلدىڭ جىلۋارالىق كەزەڭىندە الماتىدا 17،7 كم جىلۋمەن جابدىقتاۋ، 120 كم ەلەكترمەن جابدىقتاۋ، 43 كم سۋمەن جابدىقتاۋ، 29 كم گازبەن جابدىقتاۋ جەلىلەرى قايتا جاڭارتىلىپ، جوندەلۋدە.
دايىندىق جۇمىستارى «الماتى ەلەكتر ستانسيالارى» اق وبەكتىلەرىندە دە جۇرگىزىلۋدە (جەو-1، جەو-2، كاسكاد گەس، باتىس جىلۋ كەشەنى): جىلىتۋ ماۋسىمىنىڭ ۇزدىكسىز ءوتۋى ءۇشىن ەنەرگەتيكالىق گەنەراسيالايتىن جابدىققا (56 بىرلىك) جوندەۋ جۇرگىزىلۋدە.
الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ باسشىسى تالعات مالىبايەۆتىڭ اقپاراتى بويىنشا، «قالاداعى جىلۋ ەنەرگەتيكالىق كەشەننىڭ جىلىتۋ كەزەڭىنە دايىندىعى اياقتالىپ قالدى. بۇل رەتتە جىلۋ جەلىلەرىنىڭ دايىندىعى 91%-دى، سۋمەن جابدىقتاۋ – 100%-دى، ەلەكتر جەلىلەرىنىڭ دايىندىعى-99%-دى قۇرايدى».
قىسقى كەزەڭگە دايىندىق ماسەلەسى الماتى اكىمىنىڭ جەكە باقىلاۋىندا. بۇعان دەيىن ەربولات دوسايەۆ ەنەرگەتيكا جانە سۋمەن جابدىقتاۋ باسقارماسىنا (ەسجب) وڭتۇستىك اۋداندىق قازاندىققا ەرەكشە نازار اۋدارا وتىرىپ، جىلۋمەن جابدىقتاۋ وبەكتىلەرىندەگى دايىندىق جۇمىستارىنىڭ بارىسىن باقىلاۋدى تاپسىرعان بولاتىن. ەسجب دەرەكتەرىنە سايكەس، اتالعان وبەكتىدە اۋماقتى اباتتاندىرۋ، گاز قۇبىرلارىن، ءتۇتىن مۇرجالارىن وقشاۋلاۋ، مازۋتتى ساقتاۋ رەزەرۆۋارلارىنا قورشاۋ جۇمىستارى جۇرگىزىلۋدە. بۇگىنگى تاڭدا نىساننىڭ دايىندىعى 93%-دى قۇرايدى. رەكونسترۋكسيا اياقتالعاننان كەيىن قازاندىق 200 مىڭنان استام تۇتىنۋشىنى جىلۋمەن قامتاماسىز ەتەدى، ونىڭ ىشىندە بوستاندىق اۋدانىنداعى سالىنىپ جاتقان تۇرعىن ءۇي كەشەندەرى.
الماتىنىڭ تۇرعىن ءۇي قورىنىڭ دايىندىعى بەكىتىلگەن كەستەگە سايكەس، بۇگىنگى تاڭدا 96% -دى، ءبىلىم بەرۋ نىساندارىنىڭ – 98%-دى، دەنساۋلىق ساقتاۋ نىساندارىنىڭ-98% - دى قۇرايدى.
«جىلىتۋ ماۋسىمىنا تولىق دايىندىقتى قامتاماسىز ەتۋ – قالا ءۇشىن ماڭىزدى مىندەتتەردىڭ ءبىرى. قالعان جۇمىستاردى 1 قازانعا دەيىن اياقتاۋ كەرەك. گاگارين كوشەسى جول ءجۇرۋ ءۇشىن اشىلدى. قالا تۇرعىندارىنىڭ ءجۇرىپ-تۇرۋىنا ىڭعايلى بولۋ ءۇشىن قاجىمۇقان كوشەسىندەگى قۇرىلىس – مونتاج جۇمىستارىن تەز ارادا بىتىرگەن ءجون»، - دەدى ەربولات دوسايەۆ جانە ەنەرگەتيكا، ءبىلىم،دەنساۋلىق ساقتاۋ باسقارمالارىنا، سونداي-اق اۋدان اكىمدىكتەرىنە وسى ماسەلەلەردى ءجىتى باقىلاۋدى تاپسىردى.