سۋ رەسۋرستارى جانە يرريگاسيا مينيسترلىگى جاڭا سۋ كودەكسىنىڭ جوباسىن ازىرلەپ، پارلامەنت ماجىلىسىنە ەنگىزدى.
وعان قوسىمشا ازاماتتىق، جەر، ەكولوگيالىق، كاسىپكەرلىك، جەر قويناۋى جانە جەر قويناۋىن پايدالانۋ تۋرالى كودەكستەرگە وزگەرىستەر ەنگىزىلەدى، دەپ حابارلايدى aqshamnews.kz.
سونداي-اق، 28 نورماتيۆتىك-قۇقىقتىق اكتى مەن 9 زاڭ جاڭا سۋ كودەكسىنە سايكەستەندىرىلەدى. بۇل «جەرگىلىكتى مەملەكەتتىك جانە ءوزىن-وزى باسقارۋ تۋرالى»، «ەرەكشە قورعالاتىن تابيعي اۋماقتار تۋرالى»، «قازاقستان رەسپۋبليكاسىنداعى ساۋلەت، قالا قۇرىلىسى جانە قۇرىلىس قىزمەتى تۋرالى»، «اگروونەركاسىپتىك كەشەندى جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى»، «رۇقساتتار جانە حابارلامالار تۋرالى»، «ەلەكتر ەنەرگەتيكاسى تۋرالى»، «جاڭارتىلاتىن ەنەرگيا كوزدەرىن پايدالانۋدى قولداۋ تۋرالى»، «جانۋارلار دۇنيەسiن قورعاۋ، ءوسiمiن مولايتۋ جانە پايدالانۋ تۋرالى»، «اۋىل شارۋاشىلىعى كووپەراتيۆىنىڭ قىزمەتى تۋرالى» زاڭدار.
«جاڭا سۋ كودەكسى - بۇل سۋ سالاسىنىڭ نەگىزگى جۇيەسى بولاتىن ىرگەلى قۇجات. قۇجاتتىق بولىك كوپشىلىككە ءاردايىم قىزىق بولا بەرمەيتىنىن تۇسىنەمىز، ءبىراق بۇل كودەكستىڭ نەگىزى جانە قازاقستاننىڭ سۋ زاڭناماسىن وزەكتەندىرۋگە مۇمكىندىك بەرەتىندەي ەتىپ جاسادىق. كودەكس شىنىمەن ءتيىمدى بولۋى ءۇشىن باسقا قۇجاتتارعا دا وزگەرىستەر ەنگىزىلەدى. بۇل رەتتە تۇزەتۋلەر اۋىل شارۋاشىلىعىنان باستاپ قورشاعان ورتانى قورعاۋ مەن ەلەكتر ەنەرگەتيكاسىنا دەيىنگى بارلىق مۇمكىن باعىتتاردى قامتيدى»،– دەدى سۋ رەسۋرستارى جانە يرريگاسيا ءبىرىنشى ۆيسە-مينيسترى بولات بەكنياز.