بيىل نەگە شەتەلدىك فيلمدەردى قازاقشالاۋ جۇمىسى توقتاپ قالدى؟
مۇنىڭ سەبەبىن مادەنيەت جانە سپورت ءمينيسترى اسحات ورالوۆ ءتۇسىندىردى، دەپ حابارلايدى Almaty-akshamy.kz
«دۋبلياج ماسەلەسىن ءبىز قاراستىردىق. بىلەسىزدەر عوي، بىر-ەكى اي بۇرىن مادەنيەت سالاسىن دامىتۋدىڭ 7 جىلدىق تۇجىرىمداماسى بەكىتىلدى. بىلتىردىڭ وزىندە 3، 4، 5-كە دەيىن كينونىڭ دۋبلياجى ۇيىمداستىرىلعان بولاتىن. ءبىراق ءبىز تۇجىرىمداماعا باسقا كورسەتكىشتەر ەنگىزدىك. ەندىگى كەزەكتە جىل سايىن قازاقشا دۋبلياجدالاتىن فيلمدەردىڭ سانىن كەم دەگەندە 3 ەسە كوبەيتەمىز. ياعني، جىل سايىن 15 كينونىڭ دۋبلياجىن وتكىزەمىز.
بيىل دا 15-كە جەتكىزەمىز دەگەن جوسپار بار. ءبىراق تۇجىرىمداما بەكىتىلگەنىنە ەكى اي بولدى. كونكۋرس پروسەدۋرالارى بار. بۇكىل جۇمىس زاڭعا سايكەس ۇيىمداستىرىلىپ جاتىر. شىنىن ايتقاندا، 5 جىلدىڭ ىشىندە 75 كينونىڭ دۋبلياجىن وتكىزەمىز دەگەن جوسپار بار. كەيىنگى 7 جىلدا ونداي كورسەتكىش بولعان جوق. بۇعان ارنايى ۇكىمەت قاۋلىسى شىقتى. ءقازىر كونكۋرستىق پروسەدۋرالار وتەدى. جىل سوڭىنا دەيىن قولعا الىپ، جۇمىستاردى ۇيلەستىرەمىز. كەلەسى جىلدان باستاپ كەم دەگەندە ەڭ مىقتى دەگەن 15 كينونىڭ دۋبلياجى ۇيىمداستىرىلادى»، - دەدى ول.
اسحات ورالوۆتىڭ ايتۋىنشا، جىلىنا 3-5 كينونى دۋبلياجداۋ جەتكىلىكتى ەمەس.
«ويتكەنى ءقازىر حالىقتىڭ سۇراۋى بار. بىلتىردىڭ ءوزىن قارايتىن بولساق، 3-4 كينونىڭ ءوزى قانشاما سۇرانىسقا يە بولدى؟! سوندىقتان مۇنى سانىن 5 ەسەگە دەيىن كوبەيتۋ تۋرالى شەشىم قابىلدادىق»، - دەدى مينيستر.