الەمنىڭ ءبىرقاتار ەلىندە اۋا رايى قولايسىزدىق تانىتىپ جاتىر.
ۇلىبريتانيادا وتكەن اپتادا باستالعان سۋ تاسقىنى ءالى سەيىلگەن جوق. ونىمەن كۇرەسكە ميللياردتاعان قارجى ءبولىندى. شۆەسيادا قالىڭ قار جاۋىپ، جۇزدەگەن كولىك جولدا قالدى. ال اقش-تا ونداعان ميلليون تۇرعىن بورانعا بايلانىستى ەسكەرتۋ الدى، دەپ حابارلايدى اlmaty-akshamy.kz.
ۇلىبريتانيادا تاسقىننان قورعانۋعا 5،2 ملرد فۋنت ستەرلينگ ءبولىندى
ۇلىبريتانيا ۇكىمەتى ەلدى جايلاعان الاپات سۋ تاسقىنىنان قورعانىس ماقساتىندا 5 ملرد 200 ملن فۋنت ستەرلينگ نەمەسە 6 ميلليارد 600 ملن دوللار ءبولدى. قۇراما كورولدىككە "حەنك" اتتى كۇشتى داۋىل وتكەن اپتادا كوتەرىلدى. ەكپىندى جەل تۇرىپ، ۇزدىكسىز نوسەر جاۋىپ، وزەندەر تاسىعان. جاعداي ءالى قالپىنا كەلگەن جوق. ۇكىمەت سۋ تاسقىنى جايىندا 300-دەن اسا ەسكەرتۋ جاسادى.
سلوۆەنيادا 5 ادام ۇڭگىردە قالىپ قويدى
سلوۆەنيانىڭ وڭتۇستىك-باتىسىندا تولاسسىز جاۋعان نوسەردەن كەيىن وزەننىڭ دەڭگەيى كوتەرىلدى. تابيعي اپات كەزىندە كريجنا ۇڭگىرىنەن 5 ادام شىعا الماي قالعان. تاسقىن ولار ۇڭگىر ارالاپ جۇرگەن كەزدە باستالعان. ولاردى شىعارۋ ءۇشىن سۇڭگۋىرلەر مەن قۇتقارۋشىلار جىبەرىلدى. سوڭعى مالىمەتتەرگە ساي، ۇڭگىردە قالعاندارعا سۋ، تاماق جانە جىلىتقىش قۇرال جەتكىزىلگەن. قۇتقارۋ جۇمىسى قاشان اياقتالاتىنى بەلگىسىز. ادامداردى امان الىپ شىعۋ ءۇشىن سۋ دەڭگەيىنىڭ تومەندەۋى ماڭىزدى.
شۆەسيادا ۇزدەگەن كولىك قار قۇرساۋىندا قالدى
ال شۆەسيادا قىس قاھارىنا ءمىندى. ەلدە شيرەك عاسىردا بولماعان ۇسكىرىك اياز تىركەلدى. ونىڭ ۇستىنە، قالىڭ قار جاۋىپ، جۇزدەگەن كولىك قار قۇرساۋىندا قالعان. ولاردى شىعارۋ ءۇشىن پوليسيا، قۇتقارۋشىلار، قورعانىس كۇشتەرى ءتۇنى بويى جۇمىس ىستەدى. كولىك جۇرگىزۋشىلەرى 13 ساعات بويى جولدىڭ اشىلۋىن كۇتۋگە ءماجبۇر بولعان.
اقش-تا بوران سوعىپ، قالىڭ قار جاۋدى
اقش-تا بوران سوعىپ، اۋا رايىنىڭ قولايسىزدىعىنا بايلانىستى 70 ميلليون ادامعا ەسكەرتۋ جاسالدى. تۇرعىندارعا جولدا ساق بولۋعا، مەيىلىنشە الىس ساپارعا شىقپاۋعا تۋرالى كەڭەس بەرىلدى. كەي شتاتتاردا جاۋعان قاردىڭ قالىڭدىعى 30 سم-گە جەتكەن. مامانەدار، مۇنداي اۋا رايى بىرنەشە كۇنگە جالعاسۋى مۇمكىن دەپ وتىر.