رەكوردسمەن الماتىدا جانە ەلىمىزدىڭ قارۋلى كۇشتەرىندە وتكەن بىرنەشە مارافونداردىڭ جەڭىمپازى
قۇرلىق اسكەرلەرى اسكەري ينستيتۋتىنىڭ «ءالي» وقۋ-جاتتىعۋ ورتالىعى قامتاماسىز ەتۋ روتاسى جاۋىنگەرلىك كولىگىنىڭ كومانديرى 3-سىنىپتى سەرجانت راۋان ابىلحانوۆ ۋلترامارافوندى ءساتتى اياقتادى. بۇل تۋرالى Almaty-akshamy.kz قورعانىس مينيسترلىگىنە سىلتەمە جاساپ حابارلايدى.
رەسپۋبليكا كۇنى قارساڭىندا ول «ءالي» وقۋ-جاتتىعۋ ورتالىعىنان الماتى وبلىسىنىڭ شەلەك اۋدانى باعىتىندا 48 ساعات ىشىندە 350 شاقىرىمدى جۇگىرىپ وتەمىن دەپ ءسوز بەرگەن ەدى.
26 قازاندا مارافونشىنى مارە سىزىعىندا ينستيتۋت باسشىلىعى، ارىپتەستەرى، تۋىستارى مەن دوستارى قارسى الدى.
«تاباندىلىق پەن جەڭىسكە دەگەن ەرىك-جىگەردىڭ ارقاسىندا 3-سىنىپتى سەرجانت راۋان ءابىلحانوۆ 47 ساعات 23 مينۋتتا مەجەلى قاشىقتىقتى جۇگىرىپ ءوتىپ، رەكورد ورناتتى. راۋان ءوز ماقساتىنا جەتۋدە بار-كۇش جىگەرىن اياماعان ناعىز جاۋىنگەر»، – دەدى اسكەري ينستيتۋت باستىعىنىڭ ءبىرىنشى ورىنباسارى پودپولكوۆنيك جانىبەك سارعازين.
راۋان ءابىلحانوۆتىڭ جەڭىل اتلەتيكامەن اينالىسقانىنا ون جىلدان اسىپتى. رەكوردسمەن الماتىدا جانە ەلىمىزدىڭ قارۋلى كۇشتەرىندە وتكەن بىرنەشە مارافونداردىڭ جەڭىمپازى.
«بۇل مەنىڭ عانا ەمەس، بارلىق ارىپتەستەرىمنىڭ، تۋىستارىمنىڭ، دوستارىمنىڭ جەڭىسى. ولاردىڭ سەنىمى مەن ءۇمىتىن اقتاۋ ءۇشىن بار كۇش-جىگەرىمدى سالدىم»، – دەيدى 3-سىنىپتى سەرجانت راۋان ءابىلحانوۆ.
مارافونشىنىڭ قۇرمەتىنە وتكەن سالتاناتتى جيىندا قازاقستان رەكوردتار كىتابىنىڭ وكىلدەرى وعان ءتيىستى سەرتيفيكات تابىس ەتتى. ال دوستارى Kia Rio اۆتوكولىگىن سىيعا تارتتى.