ونەرىمىز ساعان – قازاقستان!
قازاقتىڭ ۇلتتىق اسپاپتارىن جەتىك مەڭگەرىپ، مەملەكەتتىك تىلدە ەركىن سويلەيتىن ۇلت وكىلدەرى الماتىدا وتكەن «ونەرىمىز ساعان – قازاقستان!» اتتى مۋزىكا فەستيۆالىندە ونەر كورسەتتى، دەپ حابارلايدى Almaty-akshamy.kz.
مادەنيەت جانە سپورت مينيسترلىگىنىڭ باسپا ءسوز قىزمەتىنەن ءمالىم ەتكەندەي، جامبىل اتىنداعى قازاق مەملەكەتتىك فيلارمونياسىنىڭ ساحناسىندا ولەگ نيكيتين دومبىرادا قۇرمانعازىنىڭ «اداي» كۇيىن، بابەك يىلدىرىم قوبىزدا «قاراكەمەر» كۇيىن ورىندادى. دەنيس ياكوۆليەۆ حالىق ءانى «ەكى جيرەندى»، وپەرا ءانشىسى انگەلينا يۋگاي «قۋانامىن» ءانىن، روكسانا قۇربانوۆا حالىق ءانى «ارمان-ايدى» كورەرمەندەردىڭ ەرەكشە قوشەمەتىنە بولەنە وتىرىپ ورىندادى. سونداي-اق باسقا دا ارتيستەر تاماشا ونەر كورسەتتى.
كونسەرتتىك باعدارلاما يگور بلاگودارنىيدىڭ ورىنداۋىنداعى «اتامەكەن» انىمەن اياقتالدى.
«ءىس-شارانىڭ نەگىزگى ماقساتى – قازاقستاندا تۇراتىن ەتنيكالىق توپتار اراسىندا قازاق حالقىنىڭ ونەرى مەن مادەنيەتىن جان-جاقتى ناسيحاتتاۋ، ورىنداۋشىلاردىڭ كاسىبي شەبەرلىگىن ارتتىرۋ»، - دەلىنگەن مينيسترلىك حابارلاماسىندا.