بيىل ءار وقۋشىعا كەم دەگەندە 37 389 تەڭگە قارجى قاراستىرىلعان
جاڭا وقۋ جىلى قارساڭىندا 150 مىڭعا جۋىق وتباسىنا مەكتەپ فورماسى مەن كەڭسە تاۋارلارىن الۋ ءۇشىن بيۋدجەتتەن قارجى اۋدارىلادى، دەپ حابارلايدى Almaty-akshamy.kz.
150 مىڭعا جۋىق وتباسى بالالارىن مەكتەپكە دايىنداۋ ءۇشىن مەملەكەتتەن قارجىلاي كومەك الىپ ۇلگەردى. بۇل كومەكتى الەۋمەتتىك وسال ساناتتاعى 440 مىڭنان استام بالا الادى.
بيىلدان باستاپ وقۋ-اعارتۋ مينيسترلىگى ماتەريالدىق كومەك كورسەتۋ ەرەجەلەرىنە وزگەرىستەر ەنگىزدى. بۇعان دەيىن وڭىرلەردە بولىنگەن سوما 17 مىڭنان 40 مىڭ تەڭگەگە دەيىن بولسا، بيىل بۇل سوما ۇلعايتىلىپ، كەمىندە 37 389 تەڭگەنى قۇراپ وتىر.
«سونداي-اق كومەك كورسەتۋ تەتىگىنە دە وزگەرىستەر ەنگىزىلدى. ەندى اتا-انالارعا مەكتەپ فورماسىن، اياق كيىم، كەڭسە تاۋارلارىن جانە ت.ب. بالالارىمەن بىرگە تاڭداپ، ساتىپ الۋى ءۇشىن جەكە شوتتارىنا اقشا اۋدارىلادى. بۇرىن مۇنىڭ بارلىعىن اكىمدىكتەر ساتىپ الاتىن جانە ول تاۋارلاردىڭ ولشەمىنە، ساپاسىنا جانە ت.ب. بايلانىستى ماسەلەلەر تۋىندايتىن»،- دەلىنگەن وقۋ -اعارتۋ مينيسترلىگىنىڭ حابارلاماسىندا.
جالپىعا بىردەي ءبىلىم بەرۋ اياسىندا اتاۋلى الەۋمەتتىك كومەك الاتىن وتباسىلاردىڭ بالالارىنا، سونداي-اق ااك المايتىن، ءبىراق جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلاردىڭ بالالارىنا، جەتىم بالالارعا جانە اتا-اناسىنىڭ قامقورلىعىنسىز قالعان بالالار، توتەنشە جاعدايعا تاپ بولعان وقۋشىلارعا جانە ت.ب. كورسەتىلەدى.