اقمولا وبلىسىندا جالعان چەكتەر بويىنشا تاۋار ساتىپ العان الاياقتار ءۇش جىل التى ايعا سوتتالدى، دەپ حابارلايدى Almaty-akshamy.kz.
اقمولا وبلىسى پوليسيا دەپارتامەنتىنىڭ مالىمەتىنشە، كوكشەتاۋ قالاسىنىڭ 24 جانە 31 جاستاعى تۇرعىندارى 2021 جىلدىڭ تامىز ايىنان قاراشا ايىنا دەيىن كراسنىي يار اۋىلىنىڭ ازىق-تۇلىك دۇكەندەرىنىڭ ءبىرىنىڭ ساتۋشىسىن جاڭىلىستىرىپ، تولەمسىز تاۋار العان.
قاسكۇنەمدەر دۇكەندەگى كاسسيرلەردىڭ ءموبيلدى قوسىمشا ارقىلى اقشا اۋدارۋ كەزىندە اۋدارۋ راستالۋىن كورسەتۋدى تالاپ ەتپەي، تەك تۇبىرتەكتىڭ بولۋىنا عانا نازار اۋداراتىنىن بايقاعان.
وسىلايشا، كليەنتتەر ءونىمدى تاڭداپ، باعاسىن ناقتىلاپ، ساتۋشىنى الداعان. الاياقتار سمارتفونداعى قوسىمشانىڭ كومەگىمەن الۋشىنىڭ ءاتى-جونى مەن سوماسىن جازىپ، جالعان تولەم چەگىن جاساعان.
شىعىن سوماسى 3 ملن 62 مىڭ تەڭگەنى قۇرادى.
كوكشەتاۋ قالالىق سوتىنىڭ ۇكىمىمەن قاسكۇنەمدەر ق ر قك 190-بابى 3-بولىگىنىڭ 1-تارماعى بويىنشا كىنالى دەپ تانىلىپ، 3 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى.