ولاردان 100 كەلى سينتەتيكا شىققان
ىشكى ىستەر ءمينيسترى ەرجان سادەنوۆ ماجىلىستە وتكەن ۇكىمەت ساعاتىندا ەسىرتكىمەن كۇرەس جايلى ايتتى، دەپ حابارلايدى اlmaty-akshamy.kz Azattyq Ruhy-نا سىلتەمە جاساپ.
«دۇنيەجۇزىندە مىڭنان استام ەسىرتكى ءتۇرى بار. قازاقستاندا 700-گە جۋىق ەسىرتكى انالوگى بار. ەلدەگى ەسىرتكى احۋالىنا ءۇش نەگىزگى فاكتور اسەر ەتەدى. ولار: كاننابيس شيكىزاتى، سولتۇستىك باعىت ارقىلى وتەتىن اۋعان گەروينى جانە سينتەتيكالىق ەسىرتكىنىڭ تارالۋى. 2019 جىلعا دەيىن ەسىرتكىنىڭ ءتىزىمى تەك زاڭ دەڭگەيىندە رەتتەلەتىن. ءتيىستى نورمالارعا وزگەرىس ەنگىزۋ ءبىر جىلعا جۋىق ۋاقىت الاتىن. بۇل ەسىرتكى تاراتۋشىلارعا قولدانىستاعى زاڭنامانى اينالىپ وتۋگە مۇمىندىك بەرەتىن»، - دەدى ول.
مينيستر اتاعانداي، قازىرگى تاڭدا ەلدەگى بارلىق ەسىرتكىنىڭ ءتۇرى باقىلاۋعا الىندى.
«ولاردى تىزىمگە قوسۋ پروسەدۋرالارى ءبىر اي ىشىندە جۇزەگە اسىرىلادى. ەلىمىزدە ەسىرتكىنىڭ جاڭا ءتۇرى پايدا بولماي تۇرىپ باقىلاۋعا الىنادى. سوڭعى 5 جىلدا سينتەتيكالىق ەسىرتكىنى تاركىلەۋ 10 كەلىدەن 1 تونناعا دەيىن كۇرت ءوستى. ءقازىر ەسىرتكى قىلمىستارى تولىعىمەن كيبەركەڭىستىككە قاراي ءوتتى. كيبەرقاداعالاۋ جۇيەسى ارقىلى انىقتالعان ەسىرتكى سايتتارى بۇعاتتالادى»، - دەدى سادەنوۆ.
مينيستر ەسىرتكىنى جارنامالاپ، ناسيحاتتاعانى ءۇشىن قىلمىستىق جاۋاپكەرشىلىك ەنگىزىلگەنىن ايتتى.
«بيىل 4 ترانسۇلتتىق ۇيىمداسقان قىلمىستىق توپ جويىلدى. 14 توپ قاتىسۋشىسى قىلمىستىق جاۋاپكەرشىلىككە تارتىلدى. ولاردىڭ 13ء-ى - شەتەلدىك ازاماتتار. ولاردان 100 كەلى سينتەتيكا، 85 توننادان استام پرەكۋرسور جانە مىڭنان استام زەرتحانالىق قۇرال تاركىلەندى. قۇقىق قورعاۋ ورگاندارى 75 ەسىرتكى زەرتحاناسىن جويدى»، - دەدى ەرجان سادەنوۆ.