وتاندىق بيزنەس وكىلدەرى ءوزارا باس قوسىپ، ەلدىڭ ەكونوميكالىق الەۋەتىن ارتتىرۋدىڭ جاڭا جولدارىن قاراستىرۋدى قولعا الدى. سونداي-اق، ولار «Qazaqstanda Jasalğan» قوزعالىسى قۇرىلعانىن اتاپ ءوتتى.
كاسىپكەرلەردىڭ ايتۋىنشا، بۇگىندە قاراپايىم حالىق، مەملەكەتتىك ورگاندار، ءىرى كورپوراسيالار، جەرگىلىكتى اتقارۋشى ورگاندار قازاقستاندىق وندىرۋشىلەر مەن وتاندىق سەرۆيستىك كومپانيالار ۇسىناتىن تاۋارلار مەن قىزمەتتەردى وتە از مولشەردە تۇتىنىپ كەلە جاتقان جايى بار. بۇل وتاندىق ءونىمنىڭ وركەندەۋىنە كەرى اسەرىن تيگىزۋدە. قوزعالىس مۇشەلەرىنىڭ اقپاراتىنا سەنسەك، ماشينا جاساۋدىڭ 92 پايىزى، جەڭىل ونەركاسىپتىڭ 96 پايىزى، كيىمدەر مەن جەيدەلەردىڭ 100 پايىزى، اياق كيىمنىڭ 99 پايىزى يمپورتتالادى ەكەن.
«ءبىزدىڭ كاسىپكەرلەرىمىزدىڭ قولىنان ءبارى كەلەدى. ءارقايسىسى ءوز سالاسىنىڭ بىلىكتى مامانىنا اينالدى. تاۋاردى ساپالى ءارى ءتيىمدى شىعارۋعا بار كۇشىن سالۋدا. دەگەنمەن، كەيدە بىزگە دە قولداۋ اۋاداي قاجەت بولاتىن كەزدەر بولادى. ونداي ساتتەردە بىر-بىرىمىزگە اقىل-كەڭەس، قولداۋ بىلدىرەتىن قوعامدىق ۇيىمنىڭ قاجەتتىلىگىن سەزىنەمىز. قازىرگى تاڭدا ەلىمىزدىڭ ءار ايماعىنان وتاندىق كاسىپكەرلەر ءوز وتىنىشتەرىن بىلدىرۋدە. بۇگىندە كاسىپكەرلەرىمىز ەلدى مەكەندەردە ءتۇرلى جۇمىس ورىندارىن اشىپ، ەلدىڭ ەكونوميكاسىن جاقسارتىپ كەلە جاتقان جايى بار. كاسىپكەرلەردىڭ كوزىندە وت بار. وتاندىق بيزنەستى قولداۋ ارقىلى ءبىز قازاقستاننىڭ الەۋەتىن كوتەرەتىنىمىزدى ۇمىتپاۋىمىز كەرەك. تاۋەلدىلىكتەن ارىلىپ، كەرەك تاۋاردى ءوزىمىز وندىرسەك، تاماشا بولار ەدى. يمپورتتى ازايتا وتىرىپ، ىشكى ءونىمدى كوبەيتە بەرۋ كەرەك. كوبەيتۋ ءۇشىن كاسىپكەرلەردى قولداۋ كەرەك»، – دەدى ق ر جيھاز جانە اعاش وڭدەۋ ونەركاسىبى قاۋىمداستىعىنىڭ پرەزيدەنتى قانات يبرايەۆ.
وسى رەتتە پرەزيدەنت قاسىم-جومارت توقايەۆتىڭ 2022 جىلدىڭ 14 شىلدەدەگى ۇكىمەتتىڭ كەڭەيتىلگەن وتىرىسىندا «قازاقستاندا جاسالعان» (Made in KZ) جالپىۇلتتىق جوباسىن ىسكە قوسۋ بويىنشا ۇسىنىستار ەنگىزۋدى تاپسىرعان كەزدە ءبىراز جۇمىس قولعا الىنا باستاعان.
«اتقارۋشى بيلىك جەرگىلىكتى كاسىپتى قولداي الماي كەلەدى. ەگەر شەتەلدەن ينۆەستور كەلسە، ونى ءبىر كۇندە ءۇش مينيستر قابىلداپ، قاجەتتى قۇجاتتارىنا قول قويىپ بەرەدى. ال قازاق كاسىپكەر كەلسە، «قازاقتار جالقاۋ»، «قازاقتاردىڭ قولىنان تۇك كەلمەيدى» دەگەن پرينسيپپەن قارايدى. ءبىراق ءبىز قازاقتىڭ جالقاۋ ەمەس ەكەنىن دالەلدەگىمىز كەلەدى، ونى ءبىز دالەلدەپ تە ءجۇرمىز. ءبىر سوزبەن ايتساق، قازاق قازاققا سەنبەيدى»، – دەيدى قورعانىس-ونەركاسىپ كەشەنى كاسىپورىندارى قاۋىمداستىعىنىڭ ءتوراعاسى ايبەك بارىسوۆ.
وتاندىق كاسىپ يەلەرى ناقتى تالاپ-تىلەگىن پىسىقتاپ، ءتيىستى ورىنعا حات جولدايتىنىن جەتكىزدى. ولاردىڭ ايتۋىنشا، ەلدەگى ەكونوميكانىڭ وسۋىنە بارشا قازاقستاندىق اتسالىپ، قولداۋ ءبىلدىرۋى قاجەت.