نومينالدى سىياقى مولشەرلەمەسى جىلدىق 2،5%-دان اسپايدى
ەڭبەك جانە حالىقتى الەۋمەتتىك قورعاۋ مينيسترلىگى 2023 جىلعى 1 قاڭتاردان باستاپ كۇشىنە ەنگەن 2021-2025 جىلدارعا ارنالعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە جاستارعا جەڭىلدىكپەن ميكروكرەديت بەرۋ قاعيداسىن بەكىتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قاعيدادا كاسىپكەرلىك قىزمەتتى باستاعىسى كەلەتىن نەمەسە كاسىپكەرلىكپەن اينالىساتىن 21 جاستان 35 جاسقا دەيىنگى جاستار ءۇشىن كونكۋرستىق نەگىزدە ميكروكرەديت بەرۋ كوزدەلگەن.
ميكروكرەديت «اگرارلىق نەسيە كورپوراسياسى» اق ارقىلى بەرىلەدى. نومينالدى سىياقى مولشەرلەمەسى جىلدىق 2،5%-دان اسپايدى.
قارىزدىڭ ەڭ جوعارى سوماسى 5 ملن تەڭگەگە دەيىن جانە ول ءۇشىن كەپىلدىڭ بولۋى مىندەتتى.
ميكروكرەديتتەردى كەز كەلگەن ماقسات ءۇشىن 5 جىلعا دەيىن، ال مال شارۋاشىلىعىنا 7 جىلعا دەيىنگى مەرزىمگە الۋعا بولادى.
سونداي-اق نەگىزگى بەرەشەك پەن سىياقىنى وتەۋ بويىنشا جەڭىلدىك كەزەڭى كوزدەلگەن، ول ميكروكرەديتتەۋ مەرزىمى ۇزاقتىعىنىڭ 1/3 (ۇشتەن بىرىنەن) اسپايدى.
قازىرگى ۋاقىتتا ەڭبەكمينى:
- جەرگىلىكتى اتقارۋشى ورگاندارمەن كرەديتتىك شارت جاساسۋ؛
- «اگرارلىق كرەديتتىك كورپوراسيا» اق-مەن جەرگىلىكتى اتقارۋشى ورگانداردىڭ تاپسىرما شارتىن جاساسۋ؛
- بيزنەس-جوبالاردى قاراۋ بويىنشا وڭىرلىك كوميسسيالار قۇرۋ بويىنشا جۇمىس جۇرگىزىپ جاتىر.
ميكروكرەديت الۋعا ءوتىنىم قابىلداۋ ۋاقىتى جانە ءوتىنىش بەرەتىن كەڭسەلەردىڭ مەكەنجايى تۋرالى اقپارات قوسىمشا حابارلانادى.