ق ر ۇكىمەتىنىڭ وتىرىسىندا توتەنشە جاعدايلار ۆيسە-مينيسترى باۋىرجان سىزدىقوۆ وڭىرلەردەگى اعىمداعى سۋ تاسقىنى جاعدايى جانە ەلدى مەكەندەردى سۋ تاسقىنىنان قورعاۋ شارالارى تۋرالى ايتتى.
باۋىرجان سىزدىقوۆ اتاپ وتكەندەي، قازىرگى ۋاقىتتا اتىراۋ، باتىس قازاقستان جانە سولتۇستىك قازاقستان وبلىستارىندا سۋ تاسقىنىن جويۋ جالعاسۋدا. ەلىمىزدىڭ باتىسىندا يريكلين سۋ قويماسىنان (رەسەي) جايىق وزەنىنە سۋ قۇيۋىلۋىنا بايلانىستى جاعداي كۇردەلەنە ءتۇستى. رەسپۋبليكانىڭ سولتۇستىگىندە سۋ اقمولا وبلىسىنان كەلەدى.
اباي، ۇلىتاۋ، پاۆلودار، قاراعاندى، اقمولا جانە قوستاناي وبلىستارىندا جاعداي تۇراقتى، جەرگىلىكتى وزەندەردەگى سۋ دەڭگەيى بىرتىندەپ تومەندەپ كەلەدى. ەلدى مەكەندەردى سۋ باسۋ ءقاۋپى جوق.
ءمينيستردىڭ مالىمەتىنشە، بۇگىندە 5 مىڭنان استام تۇرعىن ءۇي، 18 مىڭنان استام ساياجاي مەن 1 مىڭ اۋلا اۋماعى، سونداي-اق 91 عيمارات سۋ استىندا قالىپ وتىر.
«سۋ تاسقىنىنىڭ سالدارى اۋقىمدى بولدى، ەلدى مەكەندەرگە زيان كەلتىردى. 10 وبلىستا 41 جەرگىلىكتى اۋقىمداعى توتەنشە جاعداي جاريالاندى. ءقازىر اباي مەن پاۆلودار وبلىسىنىڭ 3 اۋدانىندا تج رەجيمى الىنىپ تاستالدى»، - دەدى شىڭعىس ءارىنوۆ.
ونىڭ ايتۋىنشا، تج ايماقتارىنداعى ەلدى مەكەندەردىڭ تىرشىلىگىن قامتاماسىز ەتۋ ماسەلەلەرى جەدەل شەشىلۋدە. بۇل اۋىز سۋدى جەتكىزۋگە، ەنەرگيامەن جابدىقتاۋدى قالپىنا كەلتىرۋگە جانە كولىك بايلانىسىنا قاتىستى.
ۆيسە-مينيستر سۋ تاسقىنىن جويۋ باستالعاننان بەرى شامامەن 11،6 ملن تەكشە مەتر ەرىگەن قار سۋى سورىلعانىن، 5 ملن استام بىرلىك قاپتار سالىنعانىن حابارلادى.
«قۇتقارۋ جانە شۇعىل جۇمىستار كەزىندە جاڭا ادىستەر مەن تاسىلدەر العاش رەت ەنگىزىلدى. مىسالى، اقتوبە جانە سولتۇستىك قازاقستان وبلىستارىندا پونتون كوپىرلەرىن ورناتۋ، قىسقا مەرزىمدە سۋ بۇرۋ ارنالارىن سالۋ. بۇل كولىك قاتىناسىن قامتاماسىز ەتۋگە جانە سۋ باسۋ ءقاۋپىن ازايتۋعا مۇمكىندىك بەردى»، — دەپ اتاپ ءوتتى.
سۋ باسۋ ايماقتارىنان بارلىعى 119 مىڭعا جۋىق ادام الدىن الا ەۆاكۋاسيالاندى، ونىڭ ىشىندە 44 مىڭنان استامى بالا. زارداپ شەككەندەردى ەۆاكۋاسيالاۋ جانە ورنالاستىرۋ بويىنشا بارلىق ماسەلەلەر سول جەردە جەدەل شەشىلەدى، ازاماتتار ەشنارسەدەن مۇقتاجدىق كورمەيدى. قاجەت بولعان جاعدايدا ولارعا مەديسينالىق جانە پسيحولوگيالىق كومەك كورسەتىلدى.
«قۇتقارۋشىلار بوسانعان ايەلدەردى دە قۇتقارۋعا ءماجبۇر بولعان جاعدايلار بولدى، ولاردىڭ بارلىعى اۋرۋحانالارعا امان-ەسەن جەتكىزىلدى. يەلەرى تاستاپ كەتكەن جانۋارلاردى دا قيىن جاعدايدا قالدىرمادى»، — دەپ اتاپ ءوتتى ۆيسە-مينيستر.
ول قۇتقارۋشىلار مەن تارتىلعان بارلىق قىزمەتكەرلەر تاۋلىك بويى ءارى وتە قيىن جاعدايدا جۇمىس ىستەپ جاتقانىن ايتتى. بۇگىنگى تاڭدا توتەنشە جاعدايدى جويۋعا 32 مىڭنان استام ادام، 5 مىڭعا جۋىق تەحنيكا، 310 ءجۇزۋ قۇرالدارى مەن 13 تىكۇشاق جۇمىلدىرىلعان.
اپاتتىق جانە شۇعىل جۇمىستاردى ۇزدىكسىز جۇرگىزۋ ءۇشىن 10 وڭىردە كوپتەگەن ارنايى جانە باسقا دا تەحنيكالار جەدەل تۇردە پايدالانۋعا شىعارىلدى.
«قازىرگى ۋاقىتتا مەملەكەت باسشىسىنىڭ تاپسىرماسى بويىنشا اكىمدىكتەر زارداپ شەككەندەرگە ماتەريالدىق شىعىندى ەسەپتەپ، تولەپ جاتىر. ءبىز سۋ قويمالارىن تاۋلىك بويى باقىلاۋدى جالعاستىرامىز، ازاماتتاردىڭ قاۋىپسىزدىگىن قامتاماسىز ەتۋ جانە سۋ باسۋ ءقاۋپىن ازايتۋ ءۇشىن بارلىق قاجەتتى شارالاردى قابىلداپ جاتىرمىز»، — دەپ قورىتىندىلادى ءسوزىن باۋىرجان سىزدىقوۆ.