30 جاس قازاقستاندىق «تاۋەلسىزدىك ۇرپاقتارى» گرانتىنىڭ يەگەرى اتاندى

وكق-دا وتكەن بريفينگتە «تاۋەلسىزدىك ۇرپاقتارى» جوباسىنىڭ جاڭاشىلدىعى مەن ەرەجەلەرى تۋرالى ايتىلدى. وعان ق ر مادەنيەت جانە اقپارات مينيسترلىگى جاستار جانە وتباسى ىستەرى كوميتەتىنىڭ ءتوراعاسى قايرات قامباروۆ، 2022 جانە 2023 جىلعى «تاۋەلسىزدىك ۇرپاقتارى» گرانتىنىڭ يەگەرلەرى جاندوس اقتايەۆ جانە ارايلىم سەرىكباي قاتىستى، دەپ حابارلايدى aqshamnews.kz.

2021 جىلدان باستاپ «تاۋەلسىزدىك ۇرپاقتارى» گرانتى مەملەكەت باسشىسىنىڭ باستاماسىمەن دارىندى جاستاردى مەملەكەتتىك قولداۋ ماقساتىندا بەرىلىپ كەلەدى.

گرانت مولشەرى – 3 ملن تەڭگە. وعان كونكۋرستىق نەگىزدە 14 جاستان 35 جاسقا دەيىنگى (34 جىل قوسا العاندا) قازاقستاندىقتار ۇمىتكەر بولا الادى.

بريفينگ بارىسىندا قايرات قامباروۆ ۆولونتەرلىكتى قولداۋ ءۇشىن 2024 جىلدان باستاپ قوسىمشا «ۆولونتەرلىك» باعىتى قاراستىرىلعانىن ايتتى.

وسىلايشا، اتالعان گرانت 6 باعىت بويىنشا بەرىلەدى. ونىڭ ىشىندە «عىلىم»، «مادەنيەت»، «اقپاراتتىق تەحنولوگيالار»، «بيزنەس»، «مەديا»، «ۆولونتەرلىك» باعىتتارى بار.

كونكۋرسقا وتىنىمدەردى قابىلداۋ 5 تامىزدان 6 قازانعا دەيىن جالعاسادى.

سونداي-اق، «تاۋەلسىزدىك ۇرپاقتارى» گرانتىنىڭ يەگەرلەرى ءوز باستامالارى تۋرالى ايتىپ بەردى.

مىسالى، جاندوس اقتايەۆتىڭ جوباسى قولجەتىمدى تىلدە حالىقتىڭ بازالىق قۇقىقتىق ساۋاتتىلىعىن ارتتىرۋعا ارنالعان اقپاراتتىق كونتەنت قۇرۋ. 

2023 جىلعى «تاۋەلسىزدىك ۇرپاقتارى» گرانتىنىڭ يەگەرى سەرىكباي ارايلىم گرانت قاراجاتىنا «عىلىم» باعىتى بويىنشا زاماناۋي جاسىل اگروتەحنولوگيالار پايدالانىلعان «EcoTagam» يننوۆاسيالىق وتاندىق ەكوونىمدەر ورتالىعىن اشتى. 

دارىندى جاستاردىڭ جاڭا يدەيالارى مەن ءتۇرلى جوبالارىن ىسكە اسىرۋ ماقساتىندا «تاۋەلسىزدىك ۇرپاقتارى» گرانتى 2029 جىلعا دەيىن بەرىلەدى دەپ جوسپارلانعان.