مادەنيەت جانە اقپارات مينيسترلىگى مەن «ازاماتتىق باستامالاردى قولداۋ ورتالىعى» كەاق قولداۋىمەن «ۇەۇ اكادەمياسى» جوباسى اياسىندا الماتىدا «اقپاراتتىق رەسۋرستىق ورتالىق» قوعامدىق قورىنىڭ بازاسىندا ۇەۇ بەلسەندى وكىلدەرىنە ارنالعان «جوعارى» دەڭگەيدەگى قوسىمشا كۋرس ءوتتى. بۇل كۋرس جەتەكشى قازاقستاندىق جانە شەتەلدىك ساراپشىلاردىڭ شەبەرلىك ساباقتارىن قامتىدى، دەپ حابارلايدى aqshamnews.kz
جەتى كۇن بويى قازاقستاننىڭ 100-دەن استام كوممەرسيالىق ەمەس ۇيىمدارىنىڭ وكىلدەرى ترەنينگتەرگە قاتىستى. قاتىسۋشىلار اراسىندا ايماقتىق گرانتتىق بايقاۋلاردىڭ جەڭىمپازدارى مەن العاشقى جوبالىق وتىنىمدەرىن ازىرلەۋگە دايىندالىپ جاتقان جاڭا ۇەۇ-دار بولدى.
قورىتىندى شەبەرلىك ساباقتارىن شەتەلدىك ترەنەرلەر وتكىزدى: لولا ابدۋسالياموۆا – ۇيىمداستىرۋشىلىق جانە ينستيتۋسيونالدىق دامۋ جونىندەگى كەڭەسشى، ەۋرازيا قورى، ورتالىق ازياداعى ازاماتتىق قوعامدى قولداۋ جونىندەگى USAID باعدارلاماسىنىڭ وكىلى، جانە داميرا توقتاسىنوۆا – ساراپشى، يۋنفپا ترەنەرى. ولار قاتىسۋشىلارعا الەۋمەتتىك ديزاين بويىنشا ادىستەمەلىك ۇسىنىستار بەردى. ۇەۇ وكىلدەرى جوبالىق وتىنىمدەردى باعالاۋ، الەۋمەتتىك جوبالاردى ازىرلەۋ مەن جۇزەگە اسىرۋ تۋرالى ونلاين جانە وفلاين رەجيمىندە كەڭەستەر الىپ، سۇراقتارىنا جاۋاپ الدى.
«الەۋمەتتىك ديزاين نەنى قامتيدى؟» دەگەن سۇراققا شىمكەنت رەسۋرستىق ورتالىعىنىڭ جەتەكشىسى، قازاقستاندىق ترەنەر سارا يمباروۆا جاۋاپ بەردى:
-قوعامنىڭ قاتىسۋى! الەۋمەتتىك ديزاين جەرگىلىكتى تۇرعىنداردى جوبالاردى ازىرلەۋ مەن جۇزەگە اسىرۋعا تارتۋدى قامتيدى. بۇل ازاماتتىق بەلسەندىلىكتى ارتتىرىپ، قوعامنىڭ بىرلىگىنە ىقپال ەتەدى.
«ۇەۇ اكادەمياسى» جوباسى قوعام بەلسەندىلەرىنە كەدەيلىك، جۇمىسسىزدىق، ءبىلىم مەن دەنساۋلىق ساقتاۋ سالالارىنداعى ماسەلەلەردى انىقتاپ، شەشۋگە كومەكتەسەتىن جاڭا ءبىلىم بەرەدى. سونىمەن قاتار، جوبالار ۇزاق مەرزىمدى، تۇراقتى شەشىمدەر ۇسىنۋى ءتيىس.
كۋرس سوڭىندا «ۇەۇ اكادەمياسى» جوباسىنىڭ جەتەكشى ۇيلەستىرۋشىسى سۆەتلانا پاك ترەنينگكە قاتىسۋشىلارعا الداعى جارىستاردا ساتتىلىك تىلەپ، بەلسەندى قاتىسۋشىلاردى سەرتيفيكاتتارمەن ماراپاتتادى. ول ۇەۇ-لارعا ارنالعان بۇل ءبىلىم بەرۋ كۋرسىنىڭ ماڭىزدىلىعىن اتاپ ءوتىپ، «ازاماتتىق باستامالاردى قولداۋ ورتالىعىنا» ۇەۇ-لارعا ءوز الەۋەتىن نىعايتۋعا مۇمكىندىك بەرگەنى ءۇشىن العىس ءبىلدىردى.