الماتىدا قارجى پيراميداسىنىڭ نەگىزىن قالاۋشىلارى ۇستالدى

ولار “لازادا گرۋپپ” كومپانياسىنىڭ اتىنان ارەكەت ەتكەن.

الماتى قالالىق پوليسيا دەپارتامەنتى قالادا قارجى پيراميداسىن ۇيىمداستىرعانداردى ۇستاعانىن مالىمدەدى، دەپ حابارلايدى Almaty-akshamy.kz.

بۇل جۇڭگو حالىق رەسپۋبليكاسىنىڭ ءتورت تۋماسى، ولاردىڭ ەكەۋى قانداس مارتەبەسىمەن قازاقستان ازاماتتىعىن العان، تاعى ەكەۋىنىڭ قازاقستان رەسپۋبليكاسىندا تۇرۋعا ىقتيارحاتى بار.

«كۇدىكتىلەر قاماۋعا الىندى. باستى تۇلعا – 26 جاستاعى د.ەسىمدى ازاماتشا ۋاقىتشا ۇستاۋ يزولياتورىنا قامالدى. توپتىڭ باسقا مۇشەلەرىنىڭ قىلمىسقا قاتىسى مەن ءرولى تەرگەۋ بارىسىندا انىقتالاتىن بولادى. قاسكويلەر كەلەسىدەي تىزبەك بويىنشا ارەكەت ەتتى: “لازادا گرۋپپ” كومپانياسىنىڭ اتىنان ارەكەت ەتە وتىرىپ، ولار ينتەرنەتتە كاپيتالدى ۇلعايتۋ مۇمكىندىگى تۋرالى حابارلاندىرۋ جاريالادى جانە ازاماتتارعا كريپتوۆاليۋتاعا سالىم سالۋدى ۇسىندى. اڭعال ادامدار كوپ بولىپ شىقتى: كۇماندى جوباعا كەيبىرەۋلەرى ميلليونداعان تەڭگە سالعان. شىن مانىندە، “كاسىپتى” ۇيىمداستىرۋشىلار ديۆيدەند تولەۋدى ويلاماعان دا، ولار باستاپقىدان-اق حالىقتى الداۋدى ماقسات ەتكەن. زارداپ شەككەندەر اۋداندىق پوليسيا باسقارمالارىنا جۇگىنە باستادى»، – دەيدى الماتى قالالىق پوليسيا دەپارتامەنتى باستىعىنىڭ ورىنباسارى ديدار احانوۆ. 

كۇدىكتىلەردى قالانىڭ كريمينالدىق پوليسياسىنىڭ، سونداي-اق ناۋرىزباي جانە المالى اۋداندىق پوليسيا باسقارمالارىنىڭ قىزمەتكەرلەرى "اقكەنت" شاعىناۋدانىنداعى پاتەرلەردىڭ بىرىندە ۇستادى. ماسەلە ءۇش قىز بەن ءبىر جاس جىگىت تۋرالى بولىپ وتىر. توپتىڭ ەڭ ۇلكەن مۇشەسى 26-دا، الدىن الا مالىمەت بويىنشا، ول جەتەكشى، ەڭ جاسى نەبارى 20 جاستا.  

«جەدەل تەرگەۋ توبى كۇدىكتىلەردىڭ ۇيلەرىن تەكسەرۋ بارىسىندا ءارتۇرلى ادامنىڭ اتىنا اشىلعان 60-تان استام بانك كارتاسىن، ءتورت ۇيالى تەلەفوندى، sim-كارتا مەن نوۋتبۋكتاردى تاركىلەدى. ماڭىزدى دەتال: جالعا الىنعان پاتەردەن بانكتىك كارتا شوتتارى مەن قۇپيا سوزدەرى بار بەس داپتەر دە تابىلدى. قازىرگى ۋاقىتتا ءبىرقاتار قىلمىستارعا قاتىسى بار باسقا دا ادامداردى انىقتاۋ جانە ۇستاۋعا باعىتتالعان كەشەندى جەدەل ىزدەستىرۋ ءىس-شارالارى جۇرگىزىلىپ جاتىر»، – دەدى احانوۆ.