سالتاناتتى شارا امەن قايداردىڭ مەموريالىنا گۇل شوقتارىن قويۋدان باستالدى
28 قازاندا حالىقارالىق انيماسيا كۇنى اتاپ وتىلەدى. بيىل قازاقستاندىق انيماسياعا 55 جىل تولدى. شاكەن ايمانوۆ اتىنداعى «قازاقفيلم» كينوستۋدياسىندا «قازاقانيماسيا» شىعارماشىلىق بىرلەستىگىنىڭ (شب) رەسمي اشىلۋ سالتاناتى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
1967 جىلى قازاق مۋلتيپليكاسياسىنىڭ تاريحى قويۋشى-رەجيسسەرى امەن قايداردىڭ «قارلىعاشتىڭ قۇيرىعى نەگە ايىر؟» اتتى تۇڭعىش فيلمىنەن باستاۋ الدى. مەرەيتويلىق داتاعا وراي سالتاناتتى شاراعا وتاندىق انيماسيا ارداگەرلەرى شاقىرىلدى. ولاردىڭ قاتارىندا تامارا مۇقانوۆا، ەرنست بييسەيتوۆ، گۇلميرا سادىقوۆا، گالينا دۋسەنكو، اباي توقشابايەۆ، قازاق كينوسىنىڭ اڭىزى ءاسانالى ءاشىموۆ جانە قازاق انيماسياسىنىڭ دامۋىنا ەلەۋلى ۇلەس قوسقان باسقا دا كوپتەگەن وتاندىق مادەنيەت قايراتكەرلەرى بار.
سالتاناتتى شارا امەن قايداردىڭ مەموريالىنا گۇل شوقتارىن قويۋدان باستالدى.
«ءبىرىنشى كەزەكتە، بارشاڭىزدى وسىنداي ماڭىزدى كۇنمەن، اتاپ ايتقاندا، قازاق انيماسياسىنىڭ 55 جىلدىعىمەن شىن جۇرەكتەن قۇتتىقتاعىم كەلەدى. بۇل مەرەكەلىك مەرەيتوي ءبىزدىڭ ورتاق ىسىمىزگە قاجىماي، باعا جەتپەس ۇلەس قوسقان، قازاق انيماسياسىنىڭ ارداگەرلەرى مەن ءىزباسارلارىنا شەكسىز العىسىمىزدى بىلدىرگىمىز كەلەدى. ولار ونداعان جىلدار بويى تىنىمسىز ەڭبەك ەتىپ، تاۋەلسىز قازاقستاندا انيماسيالىق سالانىڭ قايتا جاندانۋىن ارماندادى»، - دەدى «قازاقانيماسيا» شب باسشىسى جانىبەك ورازالى قۇتتىقتاۋ سوزىندە.
«قازاقانيماسيا» شىعارماشىلىق بىرلەستىگىنىڭ جۇمىسى باستالعالى ءۇش اي ىشىندە انيماسيا سالاسىنداعى الەمنىڭ جەتەكشى ماماندارىنان شەبەرلىك سىنىپتارى وتكىزىلدى. ولاردىڭ قاتارىندا رەسەي فەدەراسياسىنىڭ، فرانسيانىڭ جانە باسقا دا كوپتەگەن ەلدەردىڭ جەتەكشى ماماندارى كونستانتين برونزيت، ميحايل پەتريششيەۆ، ماريا كورنيلوۆا، ەدۆارد كۋرچيەۆسكيي، الەكسەي اندرەيەۆ، سونداي-اق جاس قازاقستاندىق ماماندار ادىلبەك بايان، يۆان ارداشوۆ جانە مارجان جۇنىسبەك بار. وقۋ باعدارلاماسى بارىسىندا ستۋدەنتتەر مەن جوبا قاتىسۋشىلارى شەتەلدىك جانە قازاقستاندىق مامانداردىڭ دارىستەرى مەن پراكتيكالىق ساباقتارىنا قاتىسىپ، كاسىبي تاجىريبەلەرىن شىندادى.
بۇگىنگى تاڭدا «قازاقانيماسيا» شىعارماشىلىق بىرلەستىگى كونكۋرستىق نەگىزدە رەسپۋبليكانىڭ ءىرى قالالارىنان مالىمدەلگەن 167 سەناريي ىشىنەن ۇزدىك 20-سىن تاڭداپ الدى. 5 مينۋتتىق انيماسيالىق كارتينالاردان تۇراتىن 20 پيلوتتىق جوبانى جەلتوقسان ايىنىڭ سوڭىنا دەيىن اياقتاۋ جوسپاردا تۇر. وسى باستامالار ارقاسىندا انيماسيا سالاسىنداعى جاس تالانتتاردى جۇمىسپەن قامتاماسىز ەتۋ مۇمكىندىگى پايدا بولدى.
«قازاقانيماسيا» شىعارماشىلىق بىرلەستىگىنىڭ رەسمي اشىلۋىندا «جانۇيا» بالالار ءۇيىنىڭ تاربيەلەنۋشىلەرىنە «مۇزبالاق» انيماسيالىق ءمۋلتفيلمى كورسەتىلدى.
«ءبىز مۋلتفيلمدەردى ادەتتە تەلەديداردان جانە يۋتۋبتان كورەمىز. مىسالى، ماشا مەن ايۋ، فيكسيكتەر تاعى باسقالار. ءبىراق ماعان قازاق مۋلتفيلمدەرى وتە ۇنايدى. بۇگىن مەن «مۇزبالاكتى» العاش كوردىمۇلكەن اسەر الدىم. باسقا دا «باتىرلار جىرى»، «الدار كوسە» سياقتى قازاق مۋلتفيلمدەرىن ءسۇيىپ تاماشالايمىن» - دەپ ءبولىستى دينا بولعىنبايەۆا.
سونىمەن قاتار، شارا بارىسىندا قازاق انيماسياسىنىڭ دامۋىنا قوسقان ۇلەسى ءۇشىن ارداگەرلەر مەن مۋلتيپليكاتورلاردىڭ قازىرگى بۋىنى ق ر مادەنيەت جانە سپورت مينيسترلىگىنىڭ ارنايى العىس حاتتارىمەن ماراپاتتالدى.
55 جىل ىشىندە ەكى جۇزگە جۋىق مۋلتفيلم ءتۇسىرىلىپ، وتىزدان اسا انيماسيالىق ستۋديالار ومىرگە كەلدى. 2018 جىلى انيماسيالىق كينوستۋديالار قاۋىمداستىعى قۇرىلىپ، ءوز كەزەگىندە بۇل قاۋىمداستىق رۋحاني-مادەني ماڭىزى بار كوپتەگەن ءىس شارالار اتقارىپ جاتىر. سونىڭ ىشىندە جىل سايىن ۇيىمداستىرىلاتىن حالىقارالىق Amen animation film festival ايرىقشا اتاپ وتۋگە بولادى. الداعى جىلى قازاق انيماسيالىق كينو ونەرىنىڭ اتاسى امەن قايداردىڭ تۋعانىنا ءبىر عاسىر ياعني 100 جىل تولماق. سونىڭ ايعاعىنداي وسىناۋ عاسىرلىق مەرەيتوي قارساڭىندا «قازاقانيماسيا» شىعارماشىلىق بىرلەستىگىندە ۇلتتىق كينونى قولداۋ مەملەكەتتىك ورتالىعىنىڭ تاپسىرىسىمەن «امەن اعانىڭ بايتەرەگى» اتتى قىسقامەتراجدى مۋلتفيلم ءتۇسىرىلۋ ۇستىندە.
«ايتا كەتەيىك، «قازاقانيماسيا» شىعارماشىلىق بىرلەستىگىنىڭ كەزەكتى باستاماسى شەتەلدىك كومپانيالاردا تاعىلىمدامادان ءوتۋ مۇمكىندىگى. قاراشا ايىنىڭ باسىندا وتاندىق انيماسيا سالاسىنداعى ماماندار بىلىكتىلىگىن ارتتىرۋ ءۇشىن تۇركيا، فرانسيا، پولشا جانە يسپانيانىڭ بەلدى شەتەلدىك ستۋديالارىنا بارادى.