فەستيۆالدە العاش رەت «اۋىلعا كىتاپ» اكسياسى وتەدى
الماتى قالاسىندا 5 قاراشادا KITAP FEST KIDS 2022 ءداستۇرلى كىتاپ فەستيۆالى وتەدى. جىلدىڭ ەڭ اۋقىمدى كىتاپ فەستيۆالى بيىلعى بالالار جىلىنا وراي ۇيىمداستىرىلىپ وتىر، دەپ حابارلايدى Almaty-akshamy.kz.
الماتى قالاسى اكىمدىگىنىڭ قولداۋىمەن «BAURZHAN foundation» قورى وتكىزىپ جاتقان شارا 2014 جىلدان بەرى ءداستۇرلى تۇردە وتكىزىلىپ كەلەدى.
8 جىل ىشىندە KitapFest-تە تانىمال قازاقستاندىق اۆتورلار مەن باسپاگەرلەردىڭ قاتىسۋىمەن 150-دەن استام كىتاپتىڭ تۇساۋكەسەرى وتكەن. ەڭ باستىسى جوبا وسى ۋاقىت ارالىعىندا شىعارماشىلىققا قۇشتار جاندار ءۇشىن اۋقىمدى ءارى بىرەگەي الاڭعا اينالىپ ۇلگەردى.
بيىلعى KITAP FEST KIDS فەستيۆالى بالالار جىلىنا ارنالعاندىقتان ونىڭ باعدارلاماسى نەگىزىنەن كىشكەنتاي وقىرماندارعا ارنالعان. ونىڭ ىشىندە ليليا كلاۋس، گۇلنار جاندىبايەۆا، گۇلجان سارسەنوۆا، اسەل ساپاقوۆا جانە تاعى باسقا كوپتەگەن بالالار جازۋشىلارىمەن كەزدەسۋ، «تاڭىس بولايىق! باتىر»، «ءبولىسۋ دەگەن – باقىت»، «باتۋ مەن ونىڭ دوستارىنىڭ شىتىرمان وقيعالارى» سىندى جاڭا تۋىندىلاردىڭ تۇساۋكەسەرى وتەدى. شارا اياسىندا جازۋشىلار ءوز كىتاپتارىن تانىستىرىپ، پىكىر الماسادى. سونداي-اق كىتاپ جارمەڭكەسى ۇيىمداستىرىلىپ، كىتاپ دۇكەندەرى، باسپاگەرلەر جانە ينتەرنەت-دۇكەندەرى ءوز ونىمدەرىن ۇسىنادى. فەستيۆال بارىسىندا كەز كەلگەن كىتاپتى 20 پايىزدىق جەڭىلدىكپەن ساتىپ الۋ مۇمكىندىگى قاراستىرىلعان.
ەڭ باستىسى، فەستيۆالدە العاش رەت «اۋىلعا كىتاپ» اكسياسى وتەدى، وندا كەز كەلگەن وقىرمان ءوز كىتابىن قازاقستاننىڭ اۋىلدىق كىتاپحانالارىنا تاپسىرا الادى.