الماتىداعى №256 سايلاۋ ۋچاسكەسىندە 2709 سايلاۋشى تىركەلگەن. بۇل سايلاۋ وكرۋگى دە جۇمىسىن تاڭعى ساعات 07.00-دە انۇرانىمىزبەن باستادى. ەڭ العاش بولىپ داۋىس بەرگەن الماتىلىقتىڭ دا ءاتى-جونى بەلگىلى، ول — شيحوتوۆ ۆلاديمير سەمەنوۆيچ. الماتىلىق ميرا قاسپاقپوۆا دا العاشقىلاردىڭ ءبىرى بولىپ ءوز تاڭداۋىن جاسادى.
— بۇل — ۇلكەن جاۋاپكەرشىلىك. باقۋاتتى ءومىر، جاڭا قازاقستاننىڭ گۇلدەنۋى ءۇشىن داۋىسىمدى بەردىم. كەشكە دەيىن ءالى ۋاقىت كوپ، سوندىقتان داۋىس بەرۋدەن قالىس قالمايىق. ءبارى ءوز قولىمىزدا، — دەيدى ول.
№256 سايلاۋ كوميسسياسىنىڭ ءتوراعاسى ءسابيت جەتپىسبايەۆ سايلاۋ وكرۋگىندە مۇمكىندىگى شەكتەۋلى ادامدارعا جەكە كابينا جانە كوزى كورمەيتىن، قۇلاعى ەستىمەيتىن جاندارعا ءوز الدىنا كومپيۋتەر قويىلعانىن اتاپ ءوتتى. ونىڭ بولجاۋىنشا، حالىقتىڭ بەلسەندىلىگى ساعات 10.00-11.00-گە قاراي ارتا تۇسەدى.