قىلمىستىق توپ ۇزاق ۋاقىت بويى اقسۋ قالاسىنىڭ تۇرعىندارىنىڭ، ونىڭ ىشىندە اقسۋ فەرروقورىتپا زاۋىتىنىڭ قىزمەتكەرلەرىنىڭ ءتۇرلى كومەك كورسەتۋ سىلتاۋىمەن سەنىمىنە كىرىپ، ۇلكەن كولەمدەگى قاراجاتتى يەمدەنگەن. قىلمىستىق توپتىڭ قۇرامىندا اقسۋدىڭ ەكى تۇرعىنى بولدى، دەپ حابارلايدى اlmaty-akshamy.kz.
ۇستاۋ شارالارىن پاۆلودار وبلىسى پروكۋراتۋراسىنىڭ ۇيلەستىرۋىمەن وبلىستىق پوليسيا ۆەدومستۆوسىنىڭ ۇيىمداسقان قىلمىسقا قارسى كۇرەس باسقارماسىنىڭ جەدەل قىزمەتكەرلەرى جۇرگىزدى.
– ۇستالعان ازاماتتار الاياقتىقتىڭ 6 فاكتىسىنە قاتىسى بار دەگەن كۇدىكتى ءىلىنىپ وتىر. شىعىن كولەمى 25 ملن تەڭگەدەن اسادى. سونداي-اق كۇدىكتىلەردىڭ پاۆلودار وبلىسىنىڭ اۋماعىندا بولعان باسقا دا قىلمىسقا قاتىسى بار-جوعى تەكسەرىلەدى. الاياقتىق فاكتىسى بويىنشا سوتقا دەيىنگى تەرگەۋ جۇرگىزىلىپ جاتىر. كۇدىكتىلەر اقسۋ قالالىق پب ۋۇي-عا قاماۋعا الىندى، – دەدى وبلىستىق پد ۇققكب باستىعىنىڭ مىندەتىن اتقارۋشى دياس قادىروۆ.
قازاقستان رەسپۋبليكاسى كونستيتۋسياسىنىڭ 77-بابى 3-تارماعىنىڭ 1-تارماقشاسىنا، قازاقستان رەسپۋبليكاسى قىلمىستىق-پروسەسسۋالدىق كودەكسىنىڭ 19-بابى 1-بولىگىنە سايكەس ادام ءوزىنىڭ كىناسى سوتتىڭ زاڭدى كۇشىنە ەنگەن ۇكىمىمەن تانىلعانعا دەيىن قىلمىس جاساعانى ءۇشىن كىناسىز دەپ ەسەپتەلەدى.