اقمولا وبلىسىندا پوليسيا قىزمەتكەرى سەرعازى مەيىرمانوۆ شيرەك عاسىردان بەرى تۇراقتى تۇردە دونور بولىپ، وسى ۋاقىت ىشىندە 20 ليترگە جۋىق قان تاپسىرىپ، 80-گە جۋىق ادامنىڭ ءومىرىن ساقتاۋعا ۇلەس قوستى، دەپ حابارلايدى Aqshamnews.kz ءتىلشىسى.
كوكشەتاۋ قالالىق پوليسيا باسقارماسىنىڭ جەدەل-كريميناليستيكالىق بولىمىندە اعا كريميناليست بولىپ قىزمەت ەتەتىن سەرعازى مەيىرمانوۆ دونورلىق جولىن 2000 جىلى، ستۋدەنت كەزىندە باستاعان. كۋرستاسىنىڭ تۋىسىنا شۇعىل قان قاجەت بولعاندا، ول العاشقىلاردىڭ ءبىرى بولىپ كومەكتەسۋگە اسىعىپتى.
«سول كەزدە ەشقانداي ەرلىك جاساماي-اق، جاي عانا قول ۇشىن سوزۋ ارقىلى بىرەۋدىڭ ءومىرىن ساقتاپ قالۋعا بولاتىنىن ءتۇسىندىم»، – دەيدى ول.
وقۋ ءبىتىرىپ، ىشكى ىستەر ورگاندارىنا قىزمەتكە تۇرعاننان كەيىن دە ءتارتىپ ساقشىسى بۇل يگى ادەتىنەن جاڭىلعان جوق. ول «5 قايىرىمدى ءىس»، جول اپاتى قۇرباندارىن ەسكە الۋ كۇنى، كريميناليستەر كۇنى سياقتى كاسىبي مەرەكەلەر اياسىندا وتەتىن دونورلىق اكسيالارعا تۇراقتى تۇردە قاتىسىپ كەلەدى.
وبلىستىق قان ورتالىعىنىڭ مالىمەتىنشە، سەرعازى مەيىرمانوۆ 40-تان استام رەت دوناسيا جاساپ، شامامەن 20 ليتر بيوماتەريال تاپسىرعان. بۇل كومەك 80-گە جۋىق ادامنىڭ ءومىرىن ساقتاۋعا سەپ بولعان.
ىزگى ءىسى ءۇشىن وعان وبلىستىق قان ورتالىعى مەن ءىىم باسشىلىعى اتىنان العىس حات تابىستالدى. ءقازىر ول ارىپتەستەرى مەن جاس ماماندار اراسىندا دونورلىق مادەنيەتتى ناسيحاتتاپ، قايىرىمدىلىققا ۇندەپ ءجۇر.